आर्थिक सहकर्मी रिजालको निधन

काठमाडौं । आर्थिक दैनिकमा कार्यरत पत्रकार हरिप्रसाद रिजालको निधन भएको छ । ४३ वर्षीय पत्रकार रिजालको शुक्रबार बिहान ३ बजेर १२ मिनेट जाँदा हृदयघातको कारण काठमाडौंको थापाथलीस्थित नर्भिक अस्पतालमा निधन भएको हो ।

पत्रकार रिजाल बिहीबार दिनभर कार्यालयको काम गरी साँझ कार्यालयनजिकै कुपण्डोलस्थित कोठामा फर्किएका थिए । नियमितजस्तै खाना खाएर सुतेका रिजाललाई हृदयघात भएपछि राति २ बजेर ५ मिनेट जाँदा नर्भिक अस्पताल पु¥याइएको थियो । अस्पतालका अनुसार रिजाललाई अस्पताल पु¥याउँदा अचेत थिए । अस्पतालले बन्द भएको मुटुको गतिलाई पुनः सञ्चालन गर्ने प्रयास गरे पनि सफल नभएपछि मृत घोषणा गरेको थियो ।

धादिङको निलकण्ठ नगरपालिका वडा नम्बर ६ सुनौलाबजार (भुवानीखर्क) निवासी रिजाल नेपाल पत्रकार महासंघ काठमाडौं शाखाका साधारण सदस्य पनि हुन् । स्वर्गीय रिजालको शुक्रबार नै पशुपति आर्यघाटमा दाहसंस्कार गरिएको छ भने नियमित काजकिरिया भने धादिङस्थित निवासमै सुरु गरिएको छ । स्वर्गीय रिजाल आर्थिक दैनिकका संस्थापक सम्पादक एंव आर्थिक दैनिक प्रालिका अध्यक्ष प्रल्हाद रिजालका सहोदर साइँलो भाइ हुन् । स्वर्गीय रिजालका एक श्रीमती र एक छोरी छन् ।

यसैबीच, आर्थिक दैनिकका सम्पादक रामप्रसाद पुडासैनीले शोक वक्तव्य जारी गरी आर्थिक दैनिकले एक असल, कर्तव्यनिष्ठ, जुझारु र ऊर्जाशील युवा पत्रकार÷कर्मचारीलाई गुमाएकोमा दुःख व्यक्त गरेका छन् । साथै शोक वक्तव्यमा स्वर्गीय रिजालप्रति हार्दिक श्रद्धाञ्जली अर्पण गर्दै दिवंगत आत्माको चिरशान्तिको कामना गर्दै शोकको घडीमा उनको परिवारमा धैर्यधारण गर्ने शक्ति प्राप्त होस् भन्ने कामना गरेका छन् ।