निर्जीवन बीमा कम्पनीको कुल बीमाशुल्क आर्जन ४० अर्ब ५७ करोड

काठमाडौं । निर्जीवन बीमा कम्पनीहरूको कुल बीमाशुल्क आर्जन बढेको छ । नेपाल बीमा प्राधिकरणका अनुसार सञ्चालनमा रहेका १४ वटा निर्जीवन बीमा कम्पनीहरूले आर्थिक वर्ष २०७९/८० मा कुल ४० अर्ब ५७ करोड ५२ लाख ३० हजार रूपैयाँ बीमाशुल्क आर्जन गरेका छन् । यो रकम अघिल्लो आर्थिक वर्षको तुलनामा तीन दशमलव ५९ प्रतिशत अर्थात् एक अर्ब ४० करोेड ५२ लाख ४० हजार रूपैयाँले बढी हो । अघिल्लो आर्थिक वर्षमा यस्तो रकम ३९ अर्ब १६ करोड ९९ लाख ९० हजार रूपैयाँ थियो ।

प्राधिकरणका अनुसार निर्जीवन बीमा कम्पनीहरूमध्येमा सबैभन्दा बढी बीमाशुल्क शिखर इन्स्योरेन्स कम्पनीले उठाएको छ । अघिल्लो आर्थिक वर्षमा पाँच अर्ब ९२ लाख २० हजार रूपैयाँ कुल बीमाशुल्क आर्जन गरेको शिखर इन्स्योरेन्सले आर्थिक वर्ष २०७९/८० मा पाँच अर्ब ५२ करोड २१ लाख ७० हजार रूपैयाँ बीमाशुल्क उठाएको छ । सगरमाथा लुम्बिनी इन्स्योरेन्स कम्पनी चार अर्ब ५५ करोड २३ लाख २० हजार रूपैयाँ उठाएर धेरै बीमाशुल्क आर्जन गर्ने कम्पनीको सूचीमा दोस्रो स्थानमा छ । अघिल्लो आर्थिक वर्षमा सगरमाथाले चार अर्ब ६९ करोड छ लाख ७० लाख रूपैयाँ बीमाशुल्क आर्जन गरेको थियो । सिद्धार्थ प्रिमियर इन्स्योरेन्स कम्पनीले पनि आर्थिक वर्ष २०७९/८० मा चार अर्ब ५१ करोड ६६ लाख ४० हजार रूपैयाँ बीमाशुल्क आर्जन गरेको छ । अघिल्लो आर्थिक वर्षमा कम्पनीको यस्तो रकम चार अर्ब ७६ करोड ८४ लाख ४० हजार रूपैयाँ रहेको थियो ।

युनाइटेड अजोड, आईजीआई प्रुडेन्सियल र हिमालयन एभरेष्ट इन्स्योरेन्स कम्पनीले भने आर्थिक वर्ष २०७/८० मा क्रमशः तीन अर्ब ४२ करोड ७३ लाख ७० हजार, तीन अर्ब ३९ करोड एक लाख र तीन अर्ब ३५ करोड ३९ लाख २० हजार रूपैयाँ रूपैयाँ बीमाशुल्क आर्जन गरेका छन् । अघिल्लो आर्थिक वर्षमा भने यी कम्पनीहरूको यस्तो रकम क्रमशः तीन अर्ब २१ करोड ७२ लाख १० हजार, तीन अर्ब १० करोड ६१ लाख ९० हजार र तीन अर्ब २८ करोड ४६ लाख २० हजार रूपैयाँ थियो । यसैगरी नेको र एनएलजी इन्स्योरेन्सले क्रमशः दुई अर्ब ९२ करोड २४ लाख रूपैयाँ र दुई अर्ब ४० करोड ५४ लाख ९० हजार रूपैयाँ कुल बीमाशुल्क आर्जन गरेका छन् । अघिल्लो आर्थिक वर्षमा यी कम्पनीहरूले क्रमशः दुई अर्ब ८५ करोड ३८ लाख ३० हजार र दुई अर्ब ३७ करोड १० लाख ७० हजार रूपैयाँ बीमाशुल्क संकलन गरेका थिए । यसैगरी राष्ट्रिय बीमा कम्पनी, सानिमा जीआईसी इन्स्योरेन्स र प्रभु इन्स्योरेन्सले आर्थिक वर्ष २०७९/८० क्रमशः दुई अर्ब ३७ करोड २३ लाख ३० हजार, दुई अर्ब ३२ करोड ४४ लाख ९० हजार र एक अर्ब ६५ करोड ८७ लाख ८० हजार कुल बीमाशुल्क आर्जन गरेका छन् । अघिल्लो आर्थिक वर्षमा यी कम्पनीहरूले क्रमशः दुई अर्ब ६४ करोड ७१ लाख ९० हजार, एक अर्ब ९४ करोड ५२ लाख २० हजार र एक अर्ब ३५ करोड ७४ लाख ८० हजार रूपैयाँ शुल्क आर्जन गरेका थिए ।

यसबाहेक नेपाल इन्स्योरेन्स कम्पनी, ओरिन्यटल इन्स्योरेन्स र नेसनल इन्स्योरेन्स कम्पनीले पनि क्रमशः एक अर्ब ५८ करोड ५८ लाख ९० हजार, एक अर्ब ५२ करोड ५० लाख २० हजार र एक अर्ब एक करोड ८३ लाख ३० हजार रूपैयाँ कुल बीमाशुल्क आर्जन गरेका छन् । अघिल्लो आर्थिक वर्षमा यी कम्पनीहरूको यस्तो रकम क्रमशः एक अर्ब ५८ करोड ६० हजार, एक अर्ब ४४ करोड १८ लाख ९० हजार र ९० करोड ६६ लाख रूपैयाँ रहेको थियो ।