एक्सन एडको रक्तदान कार्यक्रम

काठमाडौं । गैरसरकारी संस्था एक्सन एड इन्टरनेसनल नेपालले रक्तदान कार्यक्रम आयोजना गरेको छ । हरेक वर्ष अगस्ट १२ को दिन मनाइने अन्तर्राष्ट्रिय युवा दिवसको सन्दर्भमा आयोजना भएको उक्त कार्यक्रममा एक्सन एड इन्टरनेसनल नेपालका कर्मचारी र युवाहरू गरी १८ जनाले रक्तदान गरेका थिए । नेपाल रेडक्रस सोसाइटीसँगको सहकार्यमा सो कार्यक्रमको आयोजना गरिएको एक्सन एडले जनाएको छ ।

कार्यक्रममा संस्थाकी कार्यकारी निर्देशक सुजिता माथेमाले रक्तदान भनेको जीवन बचाउने कुरा रहेकोले रक्तदान गर्न कन्जुस्याइँ गर्न नहुने बताइन् । कार्यक्रम सानो भए पनि रगतको आवश्यकता हुनेका लागि एकदमै महत्वपूर्ण सहायता भएको उनको भनाइ थियो । यो वर्षायामको समयमा नेपालमा बाढी, पहिरोजस्ता विपद्को पनि सामना गर्नुपर्ने अवस्था रहेकाले हुन सक्ने रगतको आवश्यकतालाई मध्यनजर गर्दै रक्तदान कार्यक्रमको आयोजना गरेको एक्सनएडले बताएको छ ।