सुन प्रकरणमा थप अनुसन्धान गर्न सीआईबीलाई जिम्मा

काठमाडौं । राजस्व अनुसन्धान विभागले एक क्विन्टल सुन तस्करी प्रकरणबारे थप अनुसन्धान गर्न नेपाल प्रहरीको केन्द्रीय अनुसन्धान ब्युरो (सीआईबी)लाई जिम्मा लगाएको छ । विभागले आइतबार पत्रकार सम्मेलन गरी यस्तो जानकारी गराएको हो । विभाग महानिर्देशक नवराज ढुंगानाले अहिलेसम्म भएको अनुसन्धानको फाइल सीआईबीलाई पठाइएको जानकारी दिए । उनले सुन तस्करी प्रकरणको बृहत् अनुसन्धान गर्नुपर्ने भएकाले प्रहरीलाई जिम्मा लगाइएको बताएका छन् ।

महानिर्देशक ढुंगानाले अहिलेसम्म भेटिएका प्रमाणहरूको आधारमा संगठितरूपमा गरिएको अन्तरदेशीय अपराध देखिएकाले दक्ष र संगठित जनशक्तिमार्फत अनुसन्धान गर्नुपर्ने भएकाले प्रहरीलाई जिम्मा लगाइएको बताएका छन् । यसअघि बिहीबार प्रधानमन्त्री पुष्पकमल दाहाल ‘प्रचण्ड’ले अनुसन्धान गर्ने जिम्मा सीआईबीलाई दिन निर्देशन दिएका थिए ।

विभागले यही साउन ३ गते त्रिभुवन अन्तर्राष्ट्रिय विमानस्थलको भन्सार कार्यालयअगाडिबाट ‘ब्रेक सु’मा हालेर ल्याइएको अन्दाजी एक सय किलो सुन बरामद गरेको थियो । उक्त घटनामा एक जना प्रहरी उपरीक्षकको सहयोग लिएर विभाग आफैँले अनुसन्धान गरिरहेकामा १८ दिनपछि अनुसन्धानको जिम्मा सीआईबीलाई दिइएको हो । अहिलेसम्म उक्त घटनामा संलग्न रहेको आरोपमा पक्राउ परेका १७ जना व्यक्ति हिरासतमा छन् ।