पहिरोका कारण हेटौँडा-काठमाडौँ छोटोदुरीका सबै सडक अवरुद्ध

मनहरि (मकवानपुर) । अविरल वर्षा र पहिरोका कारण हेटौँडाबाट काठमाडौँ जाने छोटो दुरीका सबै सडक अवरुद्ध भएका छन् । गए रातिदेखि परेको वर्षाका कारण हेटौँडा (भैँसे)भीमफेदी सडकखण्ड पहिरोको कारण अवरुद्ध भएको हो ।

कुलेखानी-सिस्नेरी-काठमाडौँ सडकखण्डमा पनि पहिरो खसेपछि बाटो अवरुद्ध भएको छ । भीमफेदी-२ भैँसे बजारबाट दुई किलोमिटरको दूरी पहिरो खसेकोले सडक सञ्चालन अवरुद्ध भएको प्रहरीले जनाएको छ । मकवानपुरको इन्द्रसरोवर गाउँपालिका-३ भालुडाँडास्थित कुलेखानी सिस्नेरी काठमाडौँ सडक खण्डमा पहिरो खस्दा बाटो अवरुद्ध भएको हो । त्यस्तै, त्रिभुवन राजपथको भीमफेदी-९ लामिडाँडा क्षेत्रमा खसेको पहिरोका कारण सडक अवरुद्ध भएको जनाइएको छ ।

मकवानपुर ट्राफिक प्रहरी प्रमुख प्रहरी निरीक्षक वसन्त आचार्यका अनुसार अविरल वर्षा भइरहेकाले पहिरो हटाउन समस्या भइरहेको छ। त्यस्तै, कान्तिलोक पथ पनि बकैया गाउँपालिका-११ आँपचौरमा पहिरो खस्दा सडक अवरुद्ध भएको प्रहरीले जनाएको छ । प्रहरीले हेटौँडा-काठमाडौँ जाने यात्रुलाई वैकल्पिक बाटो प्रयोग गर्न आग्रह गरेको छ ।

हेटौँडा-४ हुँदै बग्ने कर्रा खोलामा भारी वर्षाका कारण आएको बाढी बस्तीमा पसेको छ । गर्दोही क्षेत्रमा रहेका केही घर डुवानमा परेको प्रहरीले जनाएको छ । खोलामा पानीको बहाव बढ्नेक्रममा रहेकाले उक्त क्षेत्रका बासिन्दालाई सुरक्षित स्थानमा जान प्रहरीले जानकारी गराएको छ ।