ओलीद्वारा सरकार भ्रष्ट र नालायक भएको आरोप

काठमाडौं । नेकपा एमालेका अध्यक्ष केपी शर्मा ओलीले गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतले अहिलेसम्म राजीनामा नदिनु आश्चर्य भएको भन्दै उनले प्रधानमन्त्री पुष्पकमल दाहाललाई राजीनामा दिन सुझाएका छन् ।

‘यति नालायक, यति अयोग्य सरकारको यस्तो भ्रष्टाचारको चाङमा उभिएर म नेतृत्व गर्छु भन्न अठ्यारो लाग्नुपर्ने हो’ ओलीले प्रधानमन्त्री पुष्पकमल दाहाल प्रचण्डलाई भने, ‘उनले आफैं राजीनामा दिनुपर्ने हो ।’ आइतबार एमालेले आयोजना गरेको पत्रकार सम्मेलनमा ओलीले सरकार भ्रष्ट र नालायक भएको बताए ।

‘राजीनामा नगरेर कसरी बस्न सकेको ?’ ओलीले भने, ‘त्यसमा पनि गृहमन्त्री जसको अभिभारा हो, त्यो बहन नगरेर फेरि पनि मन्त्री भएर झण्डा हल्लाएर हिंड्नअप्ठ्यारो लाग्नुपर्ने होइन ?’

गत साउन २ मा काठमाडौं सिनामंगलबाट बरामद सुनको विषयमा एमालेले गृहमन्त्री र अर्थमन्त्रीमाथि पनि आशंका रहेको भन्दै उच्चस्तरीय छानबिन समिति गठनको माग गर्दै आएको छ ।