उपराष्ट्रपति यादव आज चीन भ्रमणका लागि प्रस्थान गर्दै

काठमाडौँ । सोमबार जनवादी गणतन्त्र चीनको भ्रमणका लागि उपराष्ट्रपति रामसहाय प्रसाद यादव त्यसतर्फ प्रस्थान गर्दै छन् ।

नेपाली प्रतिनिधिमण्डलको नेतृत्व गर्दै सातौँ चीन दक्षिण एशिया प्रदर्शनी तथा २७औँ चीन (कुनमिङ) आयात निर्यात मेलामा सहभागी हुन उपराष्ट्रपति चीन प्रस्थान गर्न लागेको परराष्ट्र मन्त्रालयले जनाएको छ ।

उक्त प्रदर्शनी आयोजना चीनको कुनमिङमा यही साउन ३१ देखि भदौ ३ गतेसम्म हुँदैछ । उपराष्ट्रपति यादव सोमबार अपराह्न ४ः२५ बजे चाइना इस्टर्न एयरलाइन्सको नियमित उडानबाट कुनमिङ प्रस्थान गर्नेछन् ।

भ्रमण दलमा उपराष्ट्रपतिका धर्मपत्नी चम्पादेवी यादव, उपराष्ट्रपति कार्यालयका सचिव मधुसुदन बुर्लाकोटी, निजी चिकित्सक सिवाजी विक्रम सिलवाल, स्वकीय उपसचिव शत्रुधन यादव, सेनानी रत्नबहादुर श्रेष्ठ र सहसेनानी भीमसेन देवकोटा सहभागी छन् । आगामी भदौ ४ गते उपराष्ट्रपति स्वदेश फर्किने उपराष्ट्रपति कार्यालयले जनाएको छ ।