खाद्यान्न माग गर्दै नेपालले भारत सरकारलाई लेख्यो पत्र

काठमाडौं । नेपाल सरकारले खाद्यान्न माग गर्दै धान, चामल र चिनी खरिदका लागि भारत सरकारलाई पत्राचार गरेको छ । सरकारले भारतको निर्यात प्रतिबन्धको नीतिका कारण नेपाली बजारमा आपूर्ति प्रभावित हुन सक्ने भन्दै भारत सरकारलाई पत्राचार गरेको हो ।

एक लाख टन चामल, ५० हजार टन चिनी र ५ हजार टन धान नेपालमा आपूर्ति गरिदिन भारतलाई पत्राचार गरेको वाणिज्य तथा आपूर्तिमन्त्री रमेश रिजालले बताए । भारतीय दूतावासलाई लेखेको पत्र मंगलबार पुगे पनि त्यसबारे औपचारिक जवाफ नआइसकेको प्रवक्ता राधिका अर्यालले जानकारी दिइन् ।

अनौपचारिक कुराकानीमा भारतीय पक्षले नेपालका लागि उक्त प्रतिबन्ध लागू नहुने बताएको तर नेपाली बजारमा असर देखिएकाले समाधानका लागि औपचारिक पहल गरेको उनले बताइन् । खाद्यान्न आयातका लागि भारतलाई औपचारिक रुपमा पत्राचार गरिएको छ’, प्रवक्ता अर्यालले भनिन्, ‘हामी सकारात्मक जवाफको प्रतिक्षामा छौं ।’