उत्पादन र निर्यात वृद्धिमा ओलीको जोड

काठमाडौं । पूर्वप्रधानमन्त्री एवं नेकपा (एमाले)का अध्यक्ष केपी शर्मा ओलीले मुलुकको समृद्धिका लागि उत्पादकत्व र निर्यात वृद्धि गर्नुपर्ने बताएका छन् । एमालेको उद्योग, वाणिज्य तथा आपूर्ति विभागले बुधबार आयोजना गरेको ‘वर्तमान आर्थिक अवस्था : समस्या र समाधान’ विषयक छलफल कार्यक्रममा अध्यक्ष ओलीले आधारभूत आवश्यकता परिपूर्तिका लागि स्वदेशमै उत्पादन वृद्धि गर्न र निर्यात गर्न आग्रह गरेका हुन् ।

निर्यातका क्रममा कुनै समस्या भए सरकारले सहजीकरण गर्नुपर्ने पनि अध्यक्ष ओलीले बताए । अध्यक्ष ओलीले आर्थिक सामाजिक रूपान्तरणका लागि स्थायित्व, बैंकिङ सहजीकरण र लगानीको वातावरण आवश्यक रहेकोे बताए ।

सुनप्रति आशंका : अध्यक्ष ओलीले सुन तस्करीको छानबिन गर्न उच्चस्तरीय आयोग नबनाएर सरकारले एक क्विन्टल सुन ६० किलोमा झारेको आरोप लगाएका छन् । उनले निष्पक्ष आयोग नबनाएर सरकारले सुन तस्कर गरिरहेको आरोप पनि लगाए । एमालेले सुन तस्करीको अनुसन्धान गर्न आयोग गठनको माग गर्दै संसद् अवरोध गरिरहेको छ । अध्यक्ष ओलीले अहिले एयरपोर्टमा दैनिक सुन बगिरहेको पनि आरोप लगाए । उनले तस्करीको सुनमा लगानी गर्ने लगानीककर्ताको खोजी गर्नुपर्ने बताए ।