श्रमिकको न्यूनतम तलब सार्वजनिक

काठमाडौं । सरकारले चिया बगानबाहेक अन्य श्रमिकको मासिक तलब १० हजार आठ सय २० रुपैयाँ तोकेको छ । श्रमिकले उक्त तलबमा महँगी भत्ता छ हजार चार सय ८० जोडेर मासिक १७ हजार तीन सय रुपैयाँ पाउनेछन् ।

श्रम, रोजगार तथा सामाजिक सुरक्षा मन्त्रालयले बिहीबार राजपत्रमा सूचना प्रकाशित गरी मासिक तलब १० हजार आठ सय २० रुपैयाँ र महँगी भत्ता छ हजार चार सय ८० गरी १७ हजार तीन सय तोकेको हो ।

राजपत्रमा प्रकाशित सूचनाअनुसार दैनिकरूपमा श्रमिकहरूले चार सय १८ रुपैयाँ आधारभूत पारिश्रमिक र महँगी भत्ता दुई सय ५० गरी छ सय ६८ रुपैयाँ र त्यस्तै, घण्टाको ५६ रुपैयाँ आधारभूत पारिश्रमिक र ३३ रुपैयाँ महँगीसहित ८९ रुपैयाँ पाउनेछन् । तर, आंशिक समय मात्र काम गर्ने कामदारको प्रतिघण्टा न्यूनतम पारिश्रमिक भने ९५ रुपैयाँ तोकिएको छ । राजपत्रमा प्रकाशित सूचनाअनुसार तोकिएको न्यूनतम तलब र भत्ता श्रमिकहरूले साउन १ गतेदेखि नै पाउनेछन् ।

त्यस्तै, चिया बगानमा काम गर्ने श्रमिकहरूले भने मासिक आठ हजार नौ सय ३४ रुपैयाँ आधारभूत तलब र चार हजार नौ सय ५९ रुपैयाँ महँगी भत्तासहित १३ हजार आठ सय ९३ रुपैयाँ मासिकरूपमा पाउनेछन् । दैनिकरूपमा उनीहरूले तीन सय २३ रुपैयाँ आधारभूत पारिश्रमिक र एक सय ७७ रुपैयाँ महँगी भत्तासहित पाँच सय रुपैयाँको साथै प्रतिघण्टा ४३ रुपैयाँ आधारभूत तलब र २३ रुपैयाँ महँगी भत्ता गरी ६६ रुपैयाँ पाउनेछन् । तर, चिया प्रशोधन वा चिया कारखानामा काम गर्ने श्रमिक तथा चिया बगानका सरदार, नाइके र चौकीदारको दैनिक भत्ता भने ६३ रुपैयाँ मात्र हुनेछ ।

श्रम मन्त्रालयका अनुसार उक्त पारिश्रमिक अतिरिक्त श्रम ऐन २०७४, योगदानमा आधारित सामाजिक सुरक्षा ऐन, २०७४ र प्रचलित कानुनबमोजिम श्रम सम्झौता÷नियुक्तिपत्र, श्रमिकले पाउने सञ्चय कोष र उपदानलगायतका सुविधाहरू अनिवार्यरूपमा दिनुपर्नेछ । स्थानीय तहले पारिश्रमिक निर्धारण गर्दा उक्त राजपत्रको सूचनाभन्दा कम हुनेगरी निर्धारण गर्न पाउने छैनन् । स्थानीय सरकार सञ्चालन ऐन, २०७४ को दफा १३ मा स्थानीय तह वा अन्य निकायलाई न्यूनतम पारिश्रमिक निर्धारण गर्न अधिकार प्रदान गरिएको छ । राजपत्रमा प्रकाशित सूचनाभन्दा कम तलब/भत्ता लिने र दिने कसैले पनि रोजगार सम्झौता गर्न पाउने छैन ।