अध्यागमन विभागको निर्देशनपछि अन्य ट्रक चालकलाई केरुङ प्रवेशको अनुमति

काठमाडौं । चीनको केरुङसम्म जान रसुवाबाहेकका जिल्लाका ट्रक चालकलाई पनि अनुमतिपत्र जारी हुने भएको छ । अध्यागमन कार्यालय टिम्मुरे रसुवाले अध्यागमन विभागको निर्देशनपछि अन्य जिल्लाका ट्रक चालकलाई पनि केरुङ प्रवेशको अनुमतिपत्र जारी गर्न लागेको हो ।

यसै महिनाको अन्तिमबाट केरुङ प्रवेशको पास जारी गर्ने तयारी भइरहेको अध्यागमन कार्यालय रसुवाका प्रमुख चूडामणि अर्यालले बताए । रसुवाका स्थानीयहरु एक वर्षसम्म चीनतर्फ कामका लागि बस्न पाउने गरी जिल्ला प्रशासनको अनुमतिका आधारमा पास जारी भइरहेको अर्यालले बताए । सोही प्रावधान अनुसार हाल मालवस्तु ढुवानी गर्ने ट्रक तथा कन्टेनर चालकका रुपमा रसुवा जिल्लाका चालकलाई मात्रै केरुङ प्रवेशको अनुमति प्राप्त हुन्छ ।

कोभिड महामारी अघि नेपाली नागरिक, व्यवसायी, श्रमिक तथा चालकहरुले प्रवेशाज्ञा लिएर केरुङ प्रवेश पाउँथे । रसुवागढी नाका सहज बनाउन र तातोपानी नाकाबाट पनि मानिसहरुको आवाजावत खुलाउने तयारी १८ चैतमा भएको समझदारीअनुसार अन्तिम अवस्थामा पुगेको सिन्धुपाल्चोक जिल्ला प्रशासन कार्यालयले जनाएको छ ।

प्रमुख जिल्ला अधिकारी रमेश न्यौपानेका अनुसार १५ असोजसम्म तातोपानी नाकाबाट मानिसहरु आवाजावत खुल्ला गर्न चीनले सहमति जनाएको छ । एउटै जिल्लाका चालकलाई मात्रै माल वस्तु आयात गर्ने अनुमति हुँदा जनशक्तिको अभावको समस्या भएको भन्दै व्यवसायीहरुले अध्यागमन विभागको ध्यानाकर्षण गराएका थिए ।