शशांक पूर्वगृहमन्त्री खाँणलाई भेट्न कारागार पुगे

काठमाडौं । नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्री बालकृष्ण खाँणलाई नेपाली कांग्रेसका नेता डा. शशांक कोइरालाले भेटेका छन् ।

कोइराला बुधबार विहान ९ः१५ बजे खाँणलाई भेट्न केन्द्रीय कारागार सुन्धारा पुगेका थिए । खाँण र कोइरालाबीच करिब १५ मिनेट कुराकानी भएको थियो । कोइरालासँग थप दुई जना अन्य व्यक्ति पनि रहेको कारागार स्रोतले जानकारी दिएको छ ।

कांग्रेस नेताहरु डा. शेखर कोइराला, परराष्ट्रमन्त्री एनपी साउद लगायतका नेताहरुले पनि थुनामा रहेका खाँणलाई भेटिसकेका छन् । नक्कली भुटानी शरणार्थी प्रकरणको अनुसन्धानका लागि खाँण वैशाख २७ गते पक्राउ परेका थिए । जिल्ला अदालत काठमाडौंको आदेशमा उनी १ असारमा पुर्पक्षका लागि कारागार पठाइएका थिए ।