स्वीमिङ पुलमा एक्कासी करेन्ट फैलिँदा एक जना गम्भीर घाइते

काठमाडौं । शुक्रबार अपराह्न साढे २ बजे ललितपुर–३, पुल्चोकस्थित होटल स्वायरको होटलको छतमा रहेको स्वीमिङ पुलमा करेन्ट लागेर एक जना गम्भीर घाइते भएका छन् । स्वीमिङ पुलमा एक्कासी करेन्ट फैलिँदा ४१ वर्षीय सजिलमान शाक्य गम्भीर घाइते भएका हुन् ।

अहिले भेन्टिलेटरमा राखेर मेडिसिटी अस्पतालमा उनको उपचार भइरहेको छ । प्रहरी टोलीले घटनास्थलमा पुगेर मुचुल्का गरेको जिल्ला प्रहरी परिसर, ललितपुरका प्रमुख सिद्धिविक्रम शाहले बताए ।

होटल सञ्चालक रोमी अर्याल देवकोटाले भने स्वीमिङ पुलमा कुनै लिकेज वा करेन्टको फ्लो नभएको दाबी गरिन् । शाक्य श्रीमती र छोरीसहित होटलमा आधा घन्टा परिवारसँग पौडिइरहेका बेला चस्मामा बाफ जम्यो भनेर आमा, छोरी निस्किएपछि उनलाई करेन्ट लागेको शाक्यको परिवारले जनाएको छ ।