न्यायाधीश नियुक्तिमा दलीय भागबण्डा नहुने : धनराज गुरुङ

काठमाडौं। सोमबार प्रतिनिधिसभा बैठकमा प्रश्नोत्तर कार्यक्रममा भाग लिंदै अब न्यायाधीश नियुक्तिमा राजनीतिक भागबण्डा नहुने कानुन, न्याय तथा संसदीय मामिलामन्त्री धनराज गुरुङले बताएका छन् ।

न्यायाधीश नियुक्ति न्यायोचित ढंगले गर्ने कुरा भइरहेको भन्दै मन्त्री गुरुङले त्यसमा दलीय भागबण्डा नहुने बताए । उनले न्याय सम्पादनको कामलाई छिटो, छरितो बनाउन सरकार क्रियाशील रहेको दाबी समेत गरे ।

मन्त्री गुरुङले सर्वोच्च अदालत आफैंले पनि न्याय सम्पादनको कामलाई छिटो र छरितो बनाउन विभिन्न प्रयासहरु गरिरहेको उल्लेख गरे । उनले न्याय सम्पादनमा ढिलाइ हुन नदिन सरकारले जनशक्ति व्यवस्थापनको कामलाई जोड दिएको पनि बताए ।

उनले भने, ‘अब यो न्यायाधीश नियुक्तिको सन्दर्भमा भागबण्डा हुँदैन सभामुख महोदय । छिटो, छरितो रुपमा न्याय निरुपणका लागि सर्वोच्च अदालत आफैंले विभिन्न प्रयासहरु गरिरहेको छ भने आवश्यक कानुनी तथा व्यवस्थापकीय प्रबन्ध मार्फत न्याय सम्पादनलाई छिटो, छरितो बनाउनका लागि नेपाल सरकार क्रियाशील रहेको व्यहोरा अनुरोध गर्न चाहन्छु ।’