रेडक्रस सोसाइटी काठमाडौँद्वारा संस्थापक सदस्य डा. दासलाई सम्मान

काठमाडौँ । नेपाल रेडक्रस सोसाइटीको ६१औँ स्थापना दिवसका अवसरमा नेपाल रेडक्रस सोसाइटी काठमाडौँ शाखाले नेपाल रेडक्रस सोसाइटीका संस्थापक सदस्य डा. गौरीशङ्कर लाल दासलाई सम्मान गरेको छ ।

मंगलबार यहाँ आयोजित कार्यक्रममा एक सय वर्षीय डा दासलाई नेपाल रेडक्रस सोसाइटीका केन्द्रीय सभापति सुदर्शनप्रसाद नेपाल र काठमाडौँ महानगरपालिकाका प्रवक्ता नवीन मानन्धरले दोसल्ला ओढाएर सम्मानपत्रद्धारा सम्मान गरका हुन् ।

कार्यक्रममा रेडक्रसले विभिन्न आरोह–अवरोह गर्दै अहिलेको अवस्थामा आएको भन्दै सोसाइटीका केन्द्रीय अध्यक्ष नेपालले यसलाई अगाडि बढाउन आफू प्रतिबद्ध भएर लाग्ने विश्वास व्यक्त गरे । “मानवताको सेवाका लागि हामी निरन्तर लाग्छौँ”, उनले भने । रेडक्रसप्रतिको लगनशीलता र इमान्दारितालाई अगाडि बढाउने उनको भनाइ छ ।

अध्यक्ष नेपालले आफू अध्यक्ष भएर आएपछि वार्षिक साधारणसभा सम्पन्न गरेकाले अब संस्थालाई नवीकरण गर्ने, विधान संशोधन गरेर अगाडि बढ्ने बताए । “हामी सबैको एउटै मिसन र धारणा छ, हामी संस्थालाई पूर्णरूपमा मानव सेवामा लगाउँछौँ”, उनले भने ।

काठमाडौँ महानगरपालिका वडा नं १७ का वडाध्यक्ष एवं काठमाडौँ महानगरपालिकाका प्रवक्ता मानन्धरले नेपालमा रेडक्रस स्थापनामा डा. दासको भूमिका महत्वपूर्ण रहेको बताए । “व्यक्तिको कारणले रेडक्रसमा दाग आउने काम गर्न दिन हुँदैन, मेरो कारणले रेडक्रसलाई बदनाम गर्न दिन्न भन्ने प्रतिबद्धता सबै रेडक्रसमा आबद्ध सदस्यले गर्नुपर्छ”, उनले भने । विसं २०७२ को विनाशकारी भूकम्पको समयमा रेडक्रसले खेलेको भूमिका सराहनीय रहेको उनको भनाइ छ ।

डा. दासलाई काठमाडौँ महानगरपालिकाले सहयोग गर्ने प्रवक्ता मानन्धरले बताए । विसं २०७२ को विनाशकारी भूकम्पको समयमा रेडक्रसले खेलेको भूमिका सराहनीय रहेको उनको भनाइ छ । सम्मानित व्यक्तित्व डा. दासले काठमाडौँ शाखाले आफ्नो योगदान सम्झेर सम्मान गरेकामा धन्यवाद व्यक्त गरे ।

देशभर नेपाल रेडक्रस सोसाइटीको अभियानलाई अगाडि बढाउन डा. दासको महत्वपूर्ण भूमिका रहेको सोसाइटीका कार्यवाहक महामन्त्री मनोजकुमार थापा, सोसाइटीका केन्द्रीय कोषाध्यक्ष वीरबहादुर बस्नेत, सोसाइटी बागमती प्रदेशका उपमहासचिव राजेन्द्र बानियाँलगायतले बताएका थिए ।