काठमाडौं जिल्ला अदालतद्वारा मीनबहादुर गुरुङसँग २ करोड ४६ लाख रुपैयाँ धरौटी माग

काठमाडौं । व्यवसायी मीनबहादुर गुरुङसँग काठमाडौं जिल्ला अदालतले २ करोड ४६ लाख रुपैयाँ धरौटी माग गरेको छ । उनी ललिता निवास जग्गा प्रकरणमा पक्राउ परेका हुन् । आइतबार उनलाई न्यायाधीश भोलानाथ ढकालको इजलासले धरौटीमा रिहा गर्ने आदेश दिँदै २ करोड ४६ लाख रुपैयाँ धरौटी माग गरेको हो ।

जिल्ला सरकारी वकिल कार्यालयले बालुवाटारस्थित ललिता निवासको जग्गा व्यक्तिको नाममा नामसारी गरेको अनियमितता प्रकरणमा सरकारी कागजात किर्ते आरोपमा मुद्दा चलाएको थियो । केशव तुलाधरबाहेक सबै आरोपितलाई जिल्ला अदालतले धरौटीमा छाड्न आदेश दिएको छ, तर सबैको धरौटी रकम बेग्लाबेग्लै छ ।