राष्ट्रले एक देशभक्त र इमान्दार नेता गुमायो : अध्यक्ष तिमिल्सिना

काठमाडौँ । नेकपा (एमाले)का उपाध्यक्ष, संविधानसभाका अध्यक्ष, र पूर्वसभामुख सुवासचन्द्र नेम्वाङको निधनले आफू मर्माहत भएको राष्ट्रियसभाका अध्यक्ष गणेशप्रसाद तिमिल्सिनाले बताएका छन् ।

मंगलबार उनले नेम्वाङको निधनप्रति दुःख व्यक्त गर्दै संसद्ले एक अनुभवी, असल र राष्ट्रले एक सिद्धान्तनिष्ठ, देशभक्त इमान्दार नेता गुमाएको उल्लेख गरे ।

“२०६२/६३ को जनआन्दोलनपछि पुनःस्थापित संसद्मा सभामुख र पहिलो तथा दोस्रो संविधानसभामा अध्यक्षको रूपमा उहाँले खेलेको नेतृत्वदायी भूमिकाको मुलुकले सधैँ स्मरण गरिरहने छ”, जारी शोक वक्तव्यमा भनिएको छ ।

नेता नेम्वाङको सुझबुझपूर्ण ढङ्गले सबै पक्षसँग सहज संवादका माध्यमबाट सहमति कायम गराएर विवाद निरुपण गर्ने शैली सबैका लागि अनुशरणयोग्य रहेको अध्यक्ष तिमिल्सिनाले बताए । मंगलबार त्रिवि शिक्षण अस्पतालमा उनको उपचारका क्रममा १ः४० बजे हृदयघातका कारणले निधन भएको हो ।