जल्दीगाड जलविद्युत् आयोजनाको पीपीए

काठमाडौं । रुकुम पश्चिममा निर्माण हुने २० दशमलव ७३ मेगावाट क्षमताको जल्दीगाड जलविद्युत् आयोजनाको विद्युत् खरिद बिक्री सम्झौता (पीपीए) भएको छ । आयोजनाको प्रवर्द्धक सांग्रिला हाइड्रोपावर प्रालि र नेपाल विद्युत् प्राधिकरणबीच मंगलबार सम्झौता भएको हो ।

आयोजनाले उत्पादन गरेको विद्युत् हिउँद याममा आठ रुपैयाँ ४० पैसा र वर्षायाममा चार रुपैयाँ ८० पैसामा विद्युत् प्राधिकरणले खरिद गर्नेगरी सम्झौता भएको छ । आयोजनाका तर्फबाट सांग्रिला हाइड्रोपावर प्रालिका अध्यक्ष खगेन्द्र न्यौपाने र विद्युत् प्राधिकरणका तर्फबाट उपकार्यकारी निर्देशक प्रदीपकुमार थिकेले सम्झौतामा हस्ताक्षर गरेका छन् । सांग्रिला हाइड्रोपावर प्रालिका अध्यक्ष खगेन्द्र न्यौपानले यो आयोजनाको काम समयमा नै सक्ने बताए । उनका अनुसार रुकुमपश्चिम आठविसकोट नगरपालिका वार्ड नम्बर ३ र ४ मा जल्दीगाड खोलामा आयोजना निर्माण हुनेछ । चार सय २२ मिटर हेड रहेको आयोजनाको डिजाइन क्यु ४२ दशमलव पाँच रहेको छ । आयोजनामा दुई हजार पाँच सय मिटर सुरुङमार्ग र ३५ सय मिटर पेनस्टक पाइप प्रयोग गर्ने गरी बन्नेछ ।

आयोजनाले उत्पादन गरेको विद्युत् विद्युत् गृहदेखि नेपाल विद्युत् प्राधिकरणको बाफिकोट सबस्टेसनसम्म एक सय ३२ केभी क्षमताको सब स्टेसन वा आठ किमी नजिक रहेको चार सय केभीको जाजरकोट दानेपिपलमा रहेको सबस्टेसनमा जोडिनेछ । आयोजना निर्माणको अनुमानित लागत चार अर्ब रुपैयाँ रहेको छ । यसै वर्षभित्र आयोजनाको वित्तीय व्यवस्थापन सकेर निर्माणमा जाने तयारी रहेको अध्यक्ष न्यौपानेले जानकारी दिए । आयोजनाको विद्युत् उत्पादन गर्नुपर्ने मिति २०८५ मंसिरभित्र रहेको छ । आयोजनाबाट वार्षिकरूपमा एक सय २७ दशमलव २९ गिगावाट आवर विद्युत् ऊर्जा उत्पादन हुनेछ । उक्त आयोजनामा ठूलो लगानी एनआरएनएको रहनेछ भने नेपालमा रहेर विभिन्न क्षेत्रमा अब्बलता कमाएका व्यवसायीको पनि लगानी रहने अध्यक्ष न्यौपानेले बताए । उक्त हाइड्रोको प्रमुख लगानीकर्ताहरूमा एनआरएनए आईसीसी सचिव खगेन्द्र न्यौपाने, एनआरएनए आईसीसी उपाध्यक्ष आरके शर्मा, एनआरएनए युवा उपाध्यक्ष राज रेग्मी युवा व्यवसायी रवीन गुरुङसहित रहनेछन् ।