अर्थसचिव परिवर्तन

काठमाडौं  सरकारले अर्थ मन्त्रालयको सचिव परिवर्तन गरेको छ । अर्थमन्त्री डा. प्रकाशशरण महतसँग कुरा नमिलेपछि अर्जुनप्रसाद पोखरेललाई हटाएर कृष्णहरि पुष्करलाई अर्थसचिवको जिम्मा दिइएको छ । यद्यपि पुष्करसँग महतको पनि कुरा मिल्दैन । गत पुसमा तत्कालीन अर्थमन्त्री विष्णुप्रसाद पौडेलले पुष्करलाई अर्थसचिवबाट हटाएका थिए ।

पुष्करलाई हटाएर मन्त्री पौडेलले तोयम रायालाई अर्थसचिव बनाएका थिए । तर, अर्थमन्त्री महतसँग कुरा नमिलेपछि रायालाई हटाएर पोखरेललाई गत वैशाखमा अर्थसचिव बनाएका थिए । २०७८ सालमा राजस्वसचिव भएका पुष्करलाई अघिल्लो वर्ष तत्कालीन शेरबहादुर देउवा सरकारले अर्थसचिव बनाएको थियो । पटक–पटक अर्थसचिव परिवर्तन हुनाले अर्थ मन्त्रालयको नीति कार्यान्वयनमा समस्या आउने बताइएको छ । पोखरेललाई प्रधानमन्त्री तथा मन्त्रिपरिषद् कार्यालयमा सरुवा गरिएको छ । गत शुक्रबार बसेको मन्त्रिपरिषद् बैठकले ती दुई सचिव परिवर्तन गरेको हो ।