दैनिक २० केजी सुन ल्याउन पाउने

काठमाडौं । अन्ततः सुनको दैनिक आयात कोटा बढेको छ । विगत लामो समयदेखि व्यवसायीहरूले सुनको दैनिक आयत कोटा माग गर्दै आएका थिए । तर, नेपाल राष्ट्र बैंकले सुन आयातका कारण विदेशी मुद्राको सञ्चितिमा दबाब परेको भन्दै सुनको दैनिक आयात कोटालाई १० केजीमा सीमित राखेको थियो । तर, बुधबार भने राष्ट्र बैंकले परिपत्र जारी गरी सुनको दैनिक आयात कोटा २० केजी पु¥याएको छ । यो व्यवस्थाअनुसार अबदेखि वाणिज्य बैंकहरूले दैनिकरूपमा २० केजीका दरले सुन आयात गर्न पाउनेछन् ।

राष्ट्र बैंकले परिपत्रमार्फत भनेको छ, एकीकृत परिपत्र २०७९ अन्तर्गतको सुन आयात तथा बिक्रीवितरणसम्बन्धी कार्यविधि २०६८ को दफा ४ (क) ८ र दफा २४ लाई संशोधन गर्दै आयात गर्न सकिने सुनको दैनिक परिमाण हालको लागि २० केजी कायम गरिएको हो । यसअघि भने सुनको दैनिक आयात कोटा १० केजी मात्र रहेको थियो ।

नेपालमा अहिले २० वटा वाणिज्य बैंकहरू सञ्चालनमा रहेका छन् । सञ्चालनमा रहेका २० मध्ये दैनिकरूपमा सुनको आयात गर्ने बैंकको संख्या १६ वटा मात्र रहेको वाणिज्य बैंकहरूको छाता संगठन नेपाल बैंकर एसोसिएसन (एनबीए)ले जानकारी दिएको छ । वाणिज्य बैंकहरूमध्ये एभरेष्ट बैंक, नेपाल एसबीआई बैंक, स्टान्डर्ड चार्टर्ड बैंक र हिमालयन बैंकले सुन आयात गर्दैनन् । सुन आयातको लागि एनबीएले दिएको सिफारिसको आधारमा बैंकहरूले सुन आयात गर्छन् । राष्ट्र बैंकको पछिल्लो निर्देशनअनुसार अब भने वाणिज्य बैंकहरूले दैनिकरूपमा २० केजीको दरमा सुन ल्याउने भएका छन् ।