पेट्रोलियम पदार्थको मूल्य बढ्यो

काठमाडौं, सरकारले पेट्रोलियम पदार्थको मूल्य बढाएको छ । नेपाल आयल निगम सञ्चालक समितिको बैठकले पेट्रोलमा प्रतिलिटर दुई रुपैयाँ, डिजेल र मट्टीतेलमा प्रतिलिटर छ रुपैयाँ र खाना पकाउने ग्यासमा प्रतिसिलिन्डर दुई सय १५ रुपैयाँ बढाउने निर्णय गरेको हो ।
त्यस्तै हवाइ इन्धन आन्तरिक र अन्तर्राष्ट्रिय दुवैमा प्रतिलिटर आठ रुपैयाँ बढाइएको निगमले जनाएको छ । बढेको मूल्य आइतबार बिहान एक बजेपछि लागू भएको छ ।

यो वृद्धिसँगै ग्यासको मूल्य प्रतिसिलिन्डर दुई हजार एक सय १० रुपैयाँ पुगेको छ । पेट्रोलको मूल्य पहिलो वर्ग (चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगन्ज डिपोबाट बिक्री हुने ठाउँ)मा प्रतिलिटिर एक सय ८२ रुपैयाँ ५० पैसा, दोस्रो वर्ग (सुर्खेत र दाङ)मा एक सय ८४ रुपैयाँ र तेस्रो वर्गअन्तर्गत काठमाडौं, पोखरा र दिपायलमा एक सय ८५ रुपैयाँ पुगेको छ ।

त्यसैगरी डिजेलको मूल्य पहिलो वर्गमा एक सय ७६ रुपैयाँ ५० पैसा, दोस्रो वर्गमा एक सय ७८ रुपैयाँ र तेस्रो वर्गमा एक ७९ रुपैयाँ प्रतिलिटर कायम भएको छ ।आन्तरिकतर्फको हवाइ इन्धनको मूल्य प्रतिलिटर एक सय ४४ रुपैयाँ र अन्तर्राष्ट्रियको मूल्य एक दशमलव ०९५ अमेरिकी डलर कायम भएको छ ।v