भीम रावलद्वारा भारतीय प्रधानमन्त्री मोदीको नेपाल प्रवेशप्रति आपत्ति

काठमाडौं । एमाले नेता तथा पूर्वमन्त्री डा. भीम रावलले भारतीय प्रधानमन्त्री नरेन्द्र मोदीले नेपाललाई जानकारी नगराइ नेपाली भूभागमा प्रवेश गर्न लागेकोमा कडा आपत्ति जनाएका छन् ।

बिहीबार बिहान भारतीय प्रधानमन्त्री नरेन्द्र मोदी हेलिकोप्टरदवारा कालापानी क्षेत्र भ्रमणमा आएका हुन् । मोदीले नेपालको सिमाना भित्र रहेको गुञ्जिका सात गाउँमा स्थानीय बासिन्दासँग छलफल गर्ने भारतीय सञ्चारमाध्यमले जनाएको छ ।

सरकारले २०७७ जेठमा सार्वजनिक गरेको नेपालको नयाँ नक्सामा लिम्पियाधुरा, कालापानी, लिपुलेक क्षेत्रका गुन्जी, नाबी, कुटी लगायतका भूभाग पनि समेटिएको छ । उनले भ्रमण गर्ने क्रममा नेपाल–भारत सिमानाको पिथौरागढ र गुन्जीका स्थानीय बासिन्दासँग अन्तर्क्रिया गर्ने कार्यक्रम तय भएको छ । तर भारतले पिथौरागढ र गुन्जी क्षेत्र आफ्नो भएको दाबी गर्दै आएको छ ।

उनले आदिकैलाश र पार्वतीकुण्डको दर्शन गर्ने पनि कार्यक्रम रहेको छ । उनले भ्रमण गर्ने क्षेत्र नेपाल–भारत सिमानामा पर्दछन् । तर भारतले सो क्षेत्र आफ्नो भएको दाबी गर्दै आएको छ ।

मोदीको भ्रमणबारे भारतीय पक्षबाट औपचारिक पत्र प्राप्त नभएकाले धेरै जानकारी न भएता पनि अनौपचारिक रुपमा सूचना लिएको दार्चुलाकी प्रमुख जिल्ला अधिकारी किरण जोशीले जानकारी दिइन् । उनले भारतीय पक्षले नेपाललाई मोदीको भ्रमणबारे जानकारी समेत नगराएको बताइन् ।