विवादास्पद घोराही सिमेन्ट आईपीओभन्दा पनि कम मूल्यमा कारोबार

विवादास्पद घोराही सिमेन्ट आईपीओभन्दा पनि कम मूल्यमा कारोबार हुन थालेपछि सर्वसाधारणले ठगिएको महसुस गर्न थालेका छन् । सर्वसाधारणको २ अर्ब रुपैयाँ डुब्ने जोखिम भएको छ । स्वार्थ समूहको सेटिङमा कम्पनीको प्रिमियम शुल्कमा अधिक मूल्य राखेर जारी गरेको घोराही सिमेन्टको धितोपत्र बजारमा कारोबारमा आएसँग मूल्य घट्दै गएको छ ।

प्रिमियम मूल्यमा सर्वसाधारणलाई जारी गर्दा नै लुप होल प्रयोग गरी धितोपत्र बोर्डसम्मलाई छक्याउन सफल भएको घोराहीको मूल्य बिहीबार ४ सय ३० रुपैयाँसम्ममा झरेको थियो । ४ सय ३५ मूल्यमा आईपीओ जारी भएको घोराहीको मूल्य बिहीबार बजार बन्द हुँदासम्ममा ४ सय ३४ मा आएको छ । ४ सय ३९ रुपैयाँमा बिहान कारोबार भएको घोराहीको मूल्य ४ सय ३० सम्म घट्दै कारोबार बन्द हुँदासम्ममा ४ सय ३४ मा आएको हो ।

बिहीबार कम्पनीको सेयर मूल्य शून्य दशमलव ९६ प्रतिशत अर्थात् ४ दशमलव २० रुपैयाँ घटेको छ । बिहीबार दिनभरिमा कम्पनीको ४४ हजार १ सय ४८ कित्ता सेयर १ हजार १ सय ९१ पटक खरिद बिक्री हुँदा १ करोड ९२ लाख ६५ हजार रुपैयाँबराबरको कारोबार भएको छ ।

साधारण सेयरको बिक्रीकार्यमा बदनियतपूर्ण काम गरेको भन्दै अनुसन्धानको घेरामा परेको घोराही सिमेन्टले फर्जी ट्रान्सपोर्ट कम्पनीमार्फत ठूलो परिमाणमा भारतमा रकम पठाउने गरेको पुष्टि भएको थियो। घोराही सिमेन्टले फर्जी ट्रान्सपोर्ट कम्पनी आशिस ट्रान्सपोर्ट कर्पोरेसनमार्फत भारतमा रकम पठाउने गरेको विभिन्न समयमा काटिएको नक्कली बिलमार्फत पुष्टि भएको थियो। कम्पनीले सन् २०१२ मा तीन पटकमा झण्डै एक करोड रुपैयाँ नक्कली ट्रान्सपोर्ट कम्पनीमार्फत भारत पठाएको भेटिएको थियो ।

आर्थिक दैनिकलाई प्राप्त भएको केही बिलमा उल्लेख भएअनुसार कम्पनीले सन् २०१२ मा पहिलो पटक ४३ लाख ८१ हजार पाँच सय २३ रुपैयाँ, दोस्रो पटक ३८ लाख सात हजार चार सय ५० रुपैयाँ र तेस्रो पटक २३ लाख ५८ हजार पाँच सय १० रुपैयाँ आशिस ट्रान्सपोर्टमार्फत भारत पठाएको देखिएको छ ।