बोनस रकम नदिएको भन्दै चौधरी ग्रुपका मजदुरहरू आन्दोलित

नवलपुर । वार्षिक रूपमा खाइ रहेको बोनस रकम नदिएको भन्दै नवलपुरको देवचुलीमा रहेको चौधरी ग्रुपका मजदुरहरू आन्दोलित भएका छन् । चौधरी ग्रुपको सिजी ब्रुअरीमा काम गर्ने मजदुरहरूले वार्षिक रूपमा खाइ रहेको बोनस रकम नदिएको भन्दै आन्दोलित भएका हुन् ।

सिजी ब्रुअरीले गतवर्ष २८ लाखको बियर बेचेकोले त्यसबाट भएको फाइदाबाट बोनस रकम पाउनुपर्ने मजदुरहरूको भनाइ छ । गत वर्ष दसैँमा रु. ५०(६० हजार बोनस पाए पनि यस पटक एकरुपैयाँ पनि बोनस नदिएकोले आन्दोलन गर्नुपरेको मजदूरहरुले बताएका छन् ।

प्रशासनसँग पटक पटक छलफल गर्दा पनि प्रशासनले मजदुरको मागप्रति चासो दिनुको साटो उल्टै प्रहरी दमन गरेको शशी सिग्देलले बताए । प्रहरीको लाठी प्रहारबाट १० जना मजदुर घाइते भएको उनको भनाइ छ । श्रम ऐनअनुसारको सेवा सुविधा नपाएसम्म आफूहरू आन्दोलनबाट पछि नहट्ने सिग्देलले बताए ।

उद्योगका प्रतिनिधि तिलकराज शर्माले मजदुरका पक्षमा बोल्नुको साटो उल्टै आन्दोलन नगर्न र आन्दोलन गरे कामबाट निकाल्ने धम्की दिएपछि मजदुरहरू थप आक्रोशित भएका हुन् । उद्योग प्रशासनले उद्योग घाटामा गएकाले बोनस दिन नसकेको बताएको छ ।