मुआब्जापीडितले सडकमै मनाए दसैं

सङ्खुवासभा । मुआब्जा रकम माग गर्दै सडक आन्दोलन सुरु गरेको ४७ औँ दिन अरुण तेस्रोको विद्युत्गृह प्रवेश मार्गका मुआब्जापीडितले सडकमै दसैँ मनाएका छन् । प्रवेश मार्ग (सडक) निर्माण गर्दा जग्गाधनीले पाउनुपर्ने मुआब्जा नपाएको भन्दै स्थानीयवासीले सडक बन्द गरेका हुन् ।

दसैँ भित्रिसक्दासम्म पनि सरकारले निर्धारण गरेको मुआब्जा रकम नपाएपछि गत भदौ १६ देखि स्थानीयवासीले प्रवेश मार्ग बन्द गरी सामूहिक रूपमा सडकमै दसैँ मनाइएका हुन् ।

मुआब्जा सङ्घर्ष समितिका केन्द्रीय अध्यक्ष जनिकुमार राईले पटक पटक आन्दोलन गर्दा पनि सरकारले बेवास्ता गरेपछि यस पटक निर्णायक आन्दोलन भइरहेको बताए । यसअघिको आन्दोलनमा विभिन्न आश्वासन दिएर आन्दोलन रोकिए पनि माग पूरा नभएकाले यस पटक खातामा रकम नआएसम्म आन्दोलन नरोक्ने उनको भनाइ छ । हाल अरुण तेस्रोको विद्युत् गृह जाने निर्माण सामग्री र मजदुर बोकेको सवारी साधन ठप्प गरिएको छ ।