चिनियाँ समकक्षीद्वारा उपप्रधानमन्त्री श्रेष्ठको स्वास्थ्यलाभको कामना

काठमाडौँ, जनवादी चीनको भ्रमणका क्रममा रहँदा यही कात्तिक १ गते हृदयाघात भएका उपपप्रधानमन्त्री एवं गृहमन्त्री नारायणकाजी श्रेष्ठको स्वास्थ्य अवस्था सामान्य बन्दै गएको छ । उनको बेइजिङस्थित पेकिङ मेडिकल कलेज अस्पतालमा उपचार भइरहेको छ ।

आज शनिबार बिहानदेखि उपप्रधानमन्त्री श्रेष्ठ अस्पतालभित्रै सामान्य हिँडडुल गर्न थालेको उनका स्वीकय सचिव सुरेशकाजी श्रेष्ठले जानकारी दिए । उनको छातीमा हृदयाघात भएपछि ‘स्टेन्ट’ राखिएको छ ।

चिनियाँ समकक्षी एवं चीनका सार्वजनिक सुरक्षामन्त्री वाङ सियाओहङले उपप्रधानमन्त्री श्रेष्ठसँग अस्पतालमा भेट गरी शीघ्र स्वास्थ्यलाभको कामना गरेका छन् । यसअघि सार्वजनिक सुरक्षामन्त्री वाङले उपप्रधानमन्त्री श्रेष्ठको स्वास्थ्य उपचारमा कुनै कसर बाँकी नराख्न निर्देशन दिएका थिए ।

उपप्रधानमन्त्री श्रेष्ठसँग चिनियाँ कम्युनिष्ट पार्टीको केन्द्रीय अन्तर्राष्ट्रिय विभागका निर्देशक पेङ सीउ सानले भेट गरी पूर्णस्वास्थ्य लाभको कामना गरेका छन् । चीन सरकारले उपप्रधानमन्त्री श्रेष्ठको उपचारमा उच्च प्राथमिकता दिएको छ ।