अवैध नाकामार्फत कपडा तस्करी

विराटनगर । चाडपर्वको मौका छोपेर तस्करहरूले भारतीय बजारबाट अवैध सिमा नाकाको प्रयोग गरी कपडा भित्र्याउने गरेको पाइएको छ ।

गतहप्ता मात्रै सीमा सुरक्षाका साथै भन्सार राजस्व चुहावट नियन्त्रणका लागि खटिएको सशस्त्र प्रहरीको बीओपीले मोरङका विभिन्न अवैध नाकाबाट नेपाल भित्र्याइएको कपडा विराटनगरस्थित कन्चनबारी चोकबाट नियन्त्रणमा लिएपछि कपडा तस्करको सञ्जालको बारेमा खुलेको हो । गत बिहीबार राति करिब ८ बजेको समयमा विभिन्न अवैध नाकाबाट नेपालतर्फ ल्याइएका कपडासहितको गाडी र गाडी चालक समेतलाई सशस्त्र प्रहरीले नियन्त्रणमा लिएको थियो । उक्त कपडा विराटनगरबाट सुनसरीतर्फ लैजाँदै गरेको आशंका सशस्त्र प्रहरीले गरेको छ । अन्दाजी करिब सात लाख ५० हजार रुपैयाँबराबरको कुर्ता सुरुवाल मात्र गाडीमा भएको र उक्त गाडीमा कुनै भन्सारसम्बन्धी कागजात नभएपछि सशस्त्रले नियन्त्रणमा लिई आवश्यक कारबाहीका लागि विराटनगर भन्सारमा बुझाएको विराटनगर भन्सारले जानकारी दिएको छ ।

सशस्त्र प्रहरी बीओपीले विराटनगरको कञ्चनबारी चोकबाट प्र १–०४–००१ च ०११० नम्बरको बोलेरो पिकअपसहित आठ सय ३४ थान कुर्ता सुरुवाल बोकेको गाडी चेकजाँच गर्ने क्रममा कुुनै कागजात नभएपछि पक्राउ गरेको जनाएको छ । पक्राउ परेको कुुर्ता सुरुवाललाई १६ पोका बनाएर सुनसरीको इटहरी लैजाँदै गर्दा कञ्चनबारीबाट पक्राउ गरिएको सशस्त्र प्रहरीले जानकारी दिएको छ । सशस्त्र प्रहरीको बीओपीले विराटनगर भन्सारमा करिब १५ लाख रुपैयाँबराबर राजस्व चुहावट भएको दाबीसहित आवश्यक कारबाहीका लागि भन्सारमा बुझाएको हो । सशस्त्र प्रहरीले बोलेरोका चालक विराटनगर–७ का जयकुमार राईलाई समेत नियन्त्रणमा लिएको छ । सशस्त्र प्रहरीले पिकअप भ्यान, कुर्ता सुरुवालसहित चालक राईलाई आवश्यक कारबाहीका लागि गत शुक्रबार नै विराटनगर भन्सार कार्यालयमा बुझाएको थियो ।

विराटनगर भन्सारले पनि चालक राईसँग मंगलबारदेखि आवश्यक बयान लिन सुरु गरेको भन्सारका प्रमुख भन्सार अधिकृत ज्ञानेन्द्रराज ढकालले दिए । अब चालकको बयान र सामानको बजार मूल्यांकन र विद्यमान भन्सार ऐनअनुसार हदैसम्मको कारबाहीको तयारी विराटनगर भन्सारले गरिरहेको ढकालले बताए ।