निकुञ्जको राजस्व दुई करोड

सोलुखुम्बु । सगरमाथा राष्ट्रिय निकुञ्जले एकै महिनामा दुई करोड रुपैयाँभन्दा बढी राजस्व संकलन गर्न सफल भएको छ । निकुञ्जले असोज महिनामा मात्रै दुई करोड १० लाख ५४ हजार चार सय सात रुपैयाँ ५४ पैसा राजस्व सङ्कलन गरेको निकुञ्जका सुचना अधिकारी मनोजकुमार मण्डलले बताए ।

विश्वको सर्वाेच्च शिखर सगरमाथा भएको सुन्दर पर्यटकीयस्थल सोलुखुम्बुको खुम्बु क्षेत्रमा पुग्ने पर्यटकको सङ्ख्यामा पछिल्लो समयमा भारी वृद्धि भएपछि निकुञ्जले राम्रो राजस्व संकलन गर्न सफल भएको हो । चालू आर्थिक वर्ष २०८०/८१ को भदौ महिनाको तुलनामा असोजमा खुम्बु भ्रमण गर्ने पर्यटकको संख्या ८६ दशमलव ५ प्रतिशतले वृद्धि भएको थियो । निकुञ्जको तथ्यांकअनुसार भदौमा एक हजार तीन सय २४ पर्यटक सगरमाथा क्षेत्र पुगेका थिए भने असोजमा नौ हजार आठ सय १० पर्यटकले खुम्बु क्षेत्र भ्रमण गरेका छन् । जुन संख्यात्मक हिसाबले आठ हजार चार सय ८६ ले र प्रतिशतको हिसाबले ८६ दशमलव ५ प्रतिशतले बढी हो । असोजमा खुम्बु पुग्ने पर्यटकमध्ये आठ हजार पाँच सय ५१ विदेशी र एक हजार दुई सय ५९ नेपाली रहेको निकुञ्जका सूचना अधिकारी मण्डलले जानकारी दिए ।

त्यस्तै साउन महिनामा भने दुई सय आठ पर्यटक खुम्बु भित्रिदा छ लाख ५६ हजार दुई सय ७४ रुपैयाँ ३६ पैसा राजस्व सङ्कलन भएको थियो । निकुञ्जले सार्क मुलुकका पर्यटकबाट प्रतिव्यक्ति एक हजार पाँच सय, अन्य मुलुकका पर्यटकबाट तीन हजार र नेपाली पर्यटकबाट एक सय रुपैयाँ प्रवेशशुल्क लिने गरेको छ । चालू आर्थिक वर्षको पहिलो तीन महिना साउन, भदौ र असोजसम्ममा ११ हजार तीन सय ४२ पर्यटक सगरमाथा क्षेत्रको भ्रमण गरेका छन् । तीमध्ये एक हजार चार सय ५९ नेपाली, एक हजार चार सय १९ सार्क मुलुकका र आठ हजार चार सय ६४ अन्य मुलुकका विदेशी पर्यटक रहेका छन् । सो अवधिमा निकुञ्जले दुई करोड ५१ लाख पाँच हजार आठ सय ९२ रुपैयाँ चार पैसा राजस्व सङ्कलन गरेको छ ।

विसं २०३२ सालमा स्थापना भएको सगरमाथा राष्ट्रिय निकुञ्जलाई सन् १९७९ देखि विश्व सम्पदा सूचीमा समावेश गरिएको छ । यसको क्षेत्रफल एक हजार एक सय ४८ वर्ग किमि रहेको छ । यो राष्ट्रिय निकुञ्जमा विश्वको सर्वोच्च शिखर सगरमाथासहित छ हजार मिटरभन्दा अग्ला ल्होत्से, नुप्से, चोयुजस्ता हिमचुचुराहरू समेत छन् । यस निकुञ्जनभित्रको गोक्यो र सम्बद्ध ताललाई सन् २००७ मा रामसार सूचीमा समावेश गरिएको छ ।