परिवर्तनका लागि योगदान गर्ने सहिदसँगै घाइते परिवारलाई सम्मान गर्ने

घोराही । घोराही उपमहानगरपालिका–११ जीतपुरमा सहिद परिवारसँग भेटघाट गर्दै सञ्चार तथा सूचना प्रविधिमन्त्री रेखा शर्माले सहिदको योगदानलाई राज्यले उच्च सम्मान गर्ने बताएकी छिन् । मन्त्री शर्माले परिवर्तनका लागि योगदान गर्ने सहिदसँगै घाइते, अपाङ्गता परिवारलाई सम्मान गर्ने बताएकी हुन् ।

मन्त्री शर्माले सहिदहरूको नामावली राजपत्रमा प्रकाशित गरेर राज्यले सहिदको सम्मान गरेको बताइन् । शर्माले सरकारले पहिलोपटक सहिदको नाम राजपत्रमा प्रकाशन गर्ने र फागुन १ गतेलाई जनयुद्ध दिवसका रुपमा मनाउनु सहिदप्रतिको सच्चा समान्न भएको धारणा राखिन् । राजपत्रमा प्रकाशित हुन छुटेका सहिदहरुको नाम थप्ने विषयमा सरकारले काम गरिरहेको जानकारी दिदै उनले सबै दलको सहमतिमा द्वन्द्वपीडितलाई न्याय दिने बताइन् ।

सहिद परिवारसँग भेटका क्रममा मन्त्री शर्माले यस क्षेत्रको विकास निर्माणका लागि समेत पहल गर्ने प्रतिवद्धता व्यक्त गरिन् । भेटघाटका क्रममा सहिद परिवार, घाइते तथा अपाङ्गताहरुले आ–आफ्ना समस्याहरु मन्त्री शर्मासँग राखेका थिए । सहिद परिवारले गाउँको बाटो घाटो र खानेपानीको समस्या हल गर्न मन्त्री शर्मालाई आग्रह गरेका थिए ।