चितवनका सयपत्री र मखमली फूल माला हङकङ निर्यात

भरतपुर । चितवनमा कालिका नगरपालिका(२ पदमपुरका तीन जना दाजुभाइले उत्पादन गरेको उत्पादित सयपत्री र मखमली फूल हङकङ निर्यात गरिएको छ । एक हजार तीन सय माला र दुई क्विन्टल खुद्रा फूल बिहीबार हङकङ पठाइएको हो ।

किसान गोविन्द बास्तोलाले तिहारका लागि पहिलो पटक नेपालबाट सयपत्री फूल निर्यात गरिएको जानकारी दिए । उनले तीन लाख बराबरको माला निर्यात भएको बताएका छन् । अन्य देशबाट पनि सयपत्री फूलको माग आएको बताउँदै उनले विस्तारै अन्य देशमा पनि सयपत्री फूल र माला निर्यात गर्ने बताए।

चितवनमा फूल खेतीको सम्भावना राम्रो रहेको बास्तोलाले बताए । तीन भाइले तिहार लक्षित सयपत्री फूल तीन बिघामा खेती गरेका छन् । फूल खेतीबाट यसवर्ष बाह्र हजार माला र आठ क्विन्टल फूलको थुङ्गा उत्पादन हुने उनीहरुको अनुमान छ । बजार भए भने अन्य बालीभन्दा फूलखेतीबाट राम्रो आम्दानी हुने उनको भनाइ छ ।

उनीहरुले फूल खेती सुरु गरेको चार वर्ष भयो । कोरोना माहामारीपछि तीन दाजुभाइले जग्गा भाडामा लिएर फूल खेती गरेका हुन् । सप्लायर्स कमल सुवेदीले कात्तिक २४ गते राति काठमाडौँबाट जहाजमार्फत फूल हङकङ लगिने जानकारी दिए । हङकङमा बस्ने नेपाली समुदायबाट सयपत्री फूलको माग आएकाले लैजान लागिएको उनले बताए ।

फूल निर्यात गर्दा खासै फाइदा नहुने भए पनि किसानको प्रोत्साहन गर्नका लागि निर्यात गरिएको उनको भनाइ छ । चितवनमा तिहारका लागि फूल खेती गर्ने करिब एक सय जनाको हाराहारीमा किसान छन् । चितवनमा ५० बिघामा फूलखेती भएको छ ।