मालपोत कार्यालयको राजस्व ५० प्रतिशतले बढ्यो

सोलुखुम्बु । मालपोत कार्यालय सोलुखुम्बुको राजस्व ५० प्रतिशतले वृद्धि भएको छ । गत आर्थिक वर्ष २०७९/८० को पहिलो त्रैमासिकको तुलनामा चालू आर्थिक वर्ष २०८०/८१ को सोही अवधिमा राजस्व संकलन ५० दशमलव १४ प्रतिशतले वृद्धि भएको हो ।

कार्यालयको तथ्याङ्कअनुसार गत आर्थिक वर्षको पहिलो तीन महिना साउन, भदौ र असोजमा ४० लाख ७२ हजार पाँच सय ४३ रुपैयाँ राजस्व संकलन भएको थियो । तर चालू आर्थिक वर्षको सोही अवधिमा ८१ लाख २१ हजार ८० रुपैयाँ राजस्व संकलन भएको छ । चालू आर्थिक वर्षको साउनमा ३१ लाख २६ हजार छ सय ९५, भदौमा २६ लाख १५ हजार नौ सय २१ र असोजमा २३ लाख ७८ हजार चार सय ६४ रुपैयाँ राजस्व संकलन भएको खरिदार सुमन कार्कीले जानकारी दिए । पुँजीगत लाभकर बापत साउनमा १६ लाख ८९ हजार दुई सय ८८, भदौमा सात लाख ७१ हजार एक सय ६९ र असोजमा सात लाख सात हजार छ सय २५ रुपैयाँ राजस्व संकलन भएको सूचना अधिकारी कार्कीले बताए ।

पुँजीगत लाभकरणबापत संकलन भएको राजस्वमध्ये ४० प्रतिशत प्रदेश सरकार र ६० प्रतिशत स्थानीय सरकारमा जाने प्रावधान छ । सो अवधिमा ८८ वटा धितो बन्धक र तीन सय २७ वटा लिखत पारित भएका छन् । गत वर्ष जग्गा कित्ताकाट रोकिँदा गिरावट आएको राजस्व संकलन यस वर्षको भदौबाट फुकुवा भएसँगै सेवाग्राहीको चाप बढ्दा राजस्व संकलनमा वृद्धि भएको मालपोत कार्यालयले जनाएको छ ।