प्रहरीको विशेष निगरानीमा रसुवागढी नाका

रसुवा । प्रहरीले रसुवागढी नाकाबाट सुन तस्करी हुन थालेपछि विशेष निगरानी बढाएको छ । गहना बनाइ तस्करले सुन ल्याउन थालेपछि प्रहरीले निगरानी बढाएको हो । केरूङबाट बेरुवा औठी लगाई सुन आयात गर्न लागेको अवस्थामा गत आइतबार उत्तरी रसुवाका तीन जना पक्राउ परेका जिल्ला प्रहरी कार्यालयका प्रमुख सुवास बुढाथोकीले बताए । यसपछि प्रहरीले गरगहना लगाउनेप्रति विशेष निगरानी थालेकोे हो ।

केरुङमा सुन पसलको कारोबार गरिरहेका व्यापारीमार्फत गहनाका रूपमा अवैध कारोबार भएको हुनसक्ने प्रहरीले प्रारम्भिक अनुमान लगाएको छ । रसुवागढी नाकाबाट स्थायी पास पाएका रसुवावासीले मात्र केरुङ आवत जावत गर्न पाउँछन् । पास पाएका स्थानीयले अवैधरूपमा कुनै पनि सामग्री केरुङबाट ल्याउन पाउँदैनन् । राहदानीमार्फत आएका महिलाले ५० ग्राम एवं पुरूषले २५ ग्राम मात्र सुन ल्याउन पाउने प्रावधान रहेको छ ।

रसुवा जिल्ला आमाछोदिङ्मो गाउँपालिका–१ हाकु निवासी सिनेवाङ्दी तामाङ, आमाछोदिङ्मा–४ गोल्जुङकी लक्ष्मी तामाङ एवं आमाछोदिङ्मा–५ चिलिमेकी ल्हाक्पावुटी तमाङ केरूङबाट सुनको औठी ल्याई अवैध कारोबारमा संलग्न भएको आरोपमा पक्राउ परेका हुन् । रु. १४ लाख ९१ हजार छ सय २८ बरावरको १२ तोला ९१ लालबाट तयार भएका पाँच बेरुवा सुनका औठी उनीहरूको साथबाट जफत गरिएको थियो । प्रहरी प्रमुख बुढाथोकीले उनीहरुलाई रसुवा भन्सार कार्यालय टिमुरेमा बुझाइएको जानकारी दिएका छन् ।