पिपुल्स क्याम्पस प्रमुखको कार्यकक्ष र लेखा शाखामा तालाबन्दी

काठमाडौं । अखिल नेपाल राष्ट्रिय स्वतन्त्र विद्यार्थी यूनियन(क्रान्तिकारी), पिपुल्स क्याम्पस इकाई समितिले कलेजमा तालाबन्दी गरेको छ । समितिले पिपुल्स क्याम्पसको शैक्षिक माफिया र भु–माफियाविरुद्ध पहिलो चरणमा सांगठनिक काम कारवाहीसहित क्याम्पस प्रमुखको कार्यकक्ष र लेखा शाखामा तालाबन्दी गरेको विज्ञप्तिमार्फत जानकारी गराएको हो ।

समितिले क्याम्पसको शैक्षिक र भौतिक संरचना सुधारसहित विद्यार्थीको हकहितको लागि ९बुँदे ज्ञापनपत्र पेश गरेको जनाएको छ । विद्यार्थीका जायज मागहरु सम्बोधन गर्नुको सट्टा वेवास्ता गर्दै विद्यार्थीहरुको हित विपरित क्याम्पस प्रशासन गएको हुँदा संघर्षका चरण अन्तर्गत पहिलो चरणमा अनिश्चितकालिन तालाबान्दी गरेको समितिले जनाएको छ ।

साथै, समयमै विद्यार्थीहरुका मागहरु सम्बोधन नगरिए संगठन सशक्त कार्यक्रमसहित अगाडि बढ्ने र जसबाट उत्पन्न परिणामको जवाफदेहि स्वयं क्याम्पस प्रशासन हुने क्रान्तिकारी समितिले जनाएको छ ।