Techie IT
×
गृहपृष्ठसमाचारशिक्षामा एक खर्ब ७२ अर्ब

शिक्षामा एक खर्ब ७२ अर्ब


रामहरी चौंलागाईं
काठमाडौँ, जेठ १६
अर्थमन्त्री डा. अर्थमन्त्री युवराज खतिवडाले आगामी आर्थिक वर्ष २०७७/०७८ का लागि सार्वजनिक गरेको बजेटमा शिक्षा, विज्ञान तथा प्रविधि मन्त्रालयअन्तर्गत खर्च हुनेगरी एक खर्ब ७१ अर्ब ७१ करोड बजेट रकम विनियोजन गरेका छन् । यो रकम गत आर्थिक वर्षको तुलनामा आठ अर्बले बढी हो । चालू आर्थिक वर्षका लागि सरकारले शिक्षामा एक खर्ब ७२ अर्ब रूपैयाँ रकम विनियोजन गरेको छ ।

चालू आर्थिक वर्षमा एक हजार आठ सय विद्यालय भवन निर्माण गरिने घोषणा सरकारले गरेको छ । यसैगरी ३८ आंगिक क्यापसका भवन र दुई हजार पाँच सय २० कक्षा कोठा निर्माण गर्ने लक्ष्य सरकारको छ । मुलुकभरिका ४६ लाख छात्रछात्रका लागि आवश्यक पाठ्यपुस्तकका लागि दुई अर्ब ७६ करोड बजेट रकम विनियोजन गरिएको जानकारी अर्थमन्त्रीले बजेट भाषणमार्फत उल्लेख गरेका छन् । त्यसैगरी गत आवमा ४३ जिल्लामा लागू भएको दिवा खाजा कार्यक्रमलाई निरन्तरता दिँदै आगामी आबदेखि ७७ वटै जिल्लामा लागू गरिने भएको छ । सो कार्यक्रमको लागि बजेटमा आवश्यक रकमको व्यवस्था गरिएको अर्थमन्त्रीले बताएका छन् ।

कोरोना भाइरसको कहरका कारण विद्यार्थीहरूमा परेको मनोसामाजिक असर निवारणका लागि सकारात्मक सोचसहित सिर्जनशीलता विकासका लागि नयाँ किसिमका क्रियाकलाप र गतिविधि सञ्चालन गरिने जानकारी पनि अर्थमन्त्री खतिवडाले गराएका छन् । माध्यमिक तहदेखि नै प्राविधिक तथा व्यावसायिक शिक्षालाई जोड दिँदै सबै स्थानीय तहका एक विद्यालयमा प्राविधिक धारको पठनपाठन सञ्चालन गर्ने कार्यक्रम अगाडि बढाइएको छ । हालसम्म छ सय सात स्थानीय तहमा सुरु भइसकेको कार्यक्रमलाई आगामी वर्षदेखि बाँकी सबै स्थानीय तहमा विस्तार गरिने भएको छ ।

राष्ट्रपति शैक्षिक सुधार कार्यक्रमको विस्तार गरी कक्षाकोठा निर्माण, प्राविधिक शिक्षकको व्यवस्था, शिक्षक तालिम, स्वंसेवक शिक्षक तालिम, स्वयंसेवक शिक्षक परिचालन, विज्ञान प्रयोगशाला, सूचना प्रविधि ल्याब, खेल मैदान र खेल सामग्रीको व्यवस्थालगायत शैक्षिक पूर्वाधार र गुणस्तर अभिवृद्धि कार्यक्रम सञ्चालन गरिने भएको छ । यस कार्यक्रमको लागि छ अर्ब रकम विनियोजन गरिएको छ । छात्रवृत्ति कार्यक्रमलाई एकीकृतरूपमा सञ्चालन गरी विपन्न, अपाङ्ग भएका नागरिकका बालबालिक, सहिदका छोराछोरी र जेहेन्दार विद्यार्थीका लाभान्वित हुनेगरी दुई अर्ब ७० करोड रकम विनियोजन भएको छ । 



तपाईको प्रतिक्रिया