पोखरामा सुनका गरगहना र नगद चोरी गर्ने ३ जना पक्राउ

पोखरा, जिल्ला प्रहरी कार्यालय कास्कीले करिब ८ लाख रुपैयाँको सुनका गरगहना र नगद चोरी गरेको आरोपमा ३ जनालाई प्रकाउ गरेको छ । पक्राउ पर्नेमा स्याङ्जाको फेदीखोला गाउँपालिका वडा नं.३ घर भई पोखरा–२६ बस्ने विशन रानाभाट, दोलखा घर भई पोखरा–९ बस्ने २६ वर्षीय विजय प्रधान र तनहुँ शुक्लागण्डकी नगरपालिका ढोरफिर्दी घर भई पोखरा २६ बस्ने अर्जुन नेपाली छन् । उनले पोखरा महानगरपालिका वडा नं.२६ विजयपुरस्थित सम्पदा टोलबाट सुनका गरगहना र नगद चोरी गरेका थिए ।

इलाका प्रहरी कार्यालय शिशुवाबाट खटिएको प्रहरी टोलीले फागुन १ गते पोखरा महानगरपालिका २६ विजयपुर सम्पदा टोलबाट उनीहरुलाई पक्राउ गरेको हो ।उनीहरुको साथबाट माईली तिलहरी १ थान, मंगलसूत्र २ थान, झुम्का २ थान, बेरुवा औंठी १ थान, जाली औंठी १ थान र नगद १ लाख १६ हजार रुपैयाँ बरामद भएको कास्की प्रहरीका सूचना अधिकारी श्रवणकुमार विकले जानकारी दिए । पक्राउ परेकाहरुबिरुद्ध चोरीसम्बन्धी मुद्धामा ५ दिनको म्याद लिएर अनुसन्धान प्रक्रिया अघि बढाइएको डीएसपी विकले बताए ।