यो गठबन्धन बीचमा टुट्दैन आगामी निर्वाचनसम्म टिक्छ : एमाले उपाध्यक्ष ज्ञवाली

तुलसीपुर (दाङ) । प्रेस चौतारी नेपाल दाङले बिहीबार तुलसीपुरमा आयोजना गरेको पत्रकार सम्मेलनमा नेपाल कम्युनिष्ट पार्टी (एमाले)का उपाध्यक्ष युवराज ज्ञवालीले वर्तमान सत्ता गठबन्धन आगामी निर्वाचनसम्म टिक्ने बताएका छन् ।

देशको आवश्यकतानुसार यो मोर्चा बनेको उल्लेख गर्दै उपाध्यक्ष ज्ञवालीले अहिलेको गठबन्धनले राम्रो काम गरे कम्युनिष्ट एकता पनि हुनसक्ने बताए । अहिलेको मोर्चा समाजवादी मोर्चा भएको उपाध्यक्ष ज्ञवालीको भनाइ छ । उनले यो गठबन्धन बीचमा नटुट्ने भन्दै कांग्रेसलाई ढुक्कसँग प्रतिपक्षमा बस्न आग्रह गरेका छन् ।

उपाध्यक्ष ज्ञवालीका अनुसार अब मुलुकमा दुई पुँजीवादी र समाजवादी विचारधाराबीचको शान्तिपूर्ण प्रतिस्पर्धात्मक राजनीति हुन्छ । उनले मुलुकमा राजनीतिक क्रान्ति भएको भन्दै अब आर्थिक, सामाजिक र संस्कृतिकरूपमा क्रान्ति हुनु आवश्यक रहेको समेत बताए ।