नेपाली कांग्रेसकी सांसद पन्त सभापतिमा चयन

काठमाडौँ । नेपाली कांग्रेसकी सांसद कमलादेवी पन्त राष्ट्रियसभाअन्तर्गतको विकास, आर्थिक मामिला तथा सुशासन समितिको सभापतिमा सर्वसम्मत रुपमा निर्वाचित भएकी छिन् । समितिको सोमबार सिंहदरबारमा बसेको बैठकले सांसद पन्तलाई सभापतिमा चयन गरेको हो ।

राष्ट्रियसभाका अध्यक्ष नारायणप्रसाद दाहालले नवनिर्वाचित सभापति पन्तलाई पद तथा गोपनीयताको शपथ गराएका हुन् । उनले नवनिर्वाचित सभापति पन्तलाई बधाई तथा शुभकामनासमेत दिए । नवनिर्वाचित सभापति पन्तले शपथ लगत्तै पद बहाली गरिन् ।

समितिको सभापतिको कार्यकाल दुई वर्षको हुन्छ । राष्ट्रियसभा नियमावलीअनुसार समितिको सभापति पदमा निर्वाचित सदस्यले राष्ट्रियसभाका अध्यक्ष समक्ष पद तथा गोपनीयताको शपथ लिनुपर्ने व्यवस्था रहेको छ । सो अवसरमा सभापति पन्तले दिगो विकासका लक्ष्य हासिल गर्न आर्थिक सबलीकरण, जलवायु परिवर्तनको जोखिम न्यूनीकरणलगायत महत्वपूर्ण विषयलाई प्रभावकारी रुपमा उठाउने बताइन् ।

भ्रष्टाचार न्यूनीकरण नभएसम्म सुशासन प्रवर्द्धन नहुने भन्दै सभापति पन्तले त्यसतर्फ समिति क्रियाशील रहने बताइन् ।