कोशीटप्पुमा भाले गैँडा स्थानान्तरण गरिने

भरतपुर (चितवन) । कोशीटप्पु वन्यजन्तु आरक्षमा चितवन राष्ट्रिय निकुञ्जबाट एक भाले गैँडा स्थानान्तरण गरिने भएको छ । कोशीटप्पुमा यहाँबाट दोस्रो पटक गैँडा स्थानान्तरण गर्न लागिएको हो ।

यसअघि पुष्पा र अञ्जली नाम राखिएका दुई पोथी गैँडालाई गत असोज ९ गते कोशीमा स्थानान्तरण गरिएको थियो । निकुञ्जका सूचना अधिकारी गणेशप्रसाद तिवारीले वन मन्त्रालयको निर्णयअनुसार एउटा भाले गैँडा कोशीटप्पु स्थानान्तरण गर्ने तयारी गरिएको जानकारी दिए ।

यसअघि स्थानान्तरण गरिएका पोथी गैँडालाई जोडी मिलाउन भाले गैँडा स्थानान्तरण गर्न लागिएको उनले बताए । चैतभित्र गैँडा स्थानान्तरण गर्न निकुञ्जभित्र आन्तरिक स्थानान्तरण भइरहेका बेला कोशीटप्पुमा पनि एउटा गैँडा लैजान लागिएको उनले बताए ।

“भाले गैँडा लगेपछि कोशीटप्पुमा प्रजनन प्रक्रिया सुरु हुन्छ”, उनले भने, “जतिसक्दो छिटो वयस्क भाले गैँडा स्थानान्तरण गर्नेगरी तयारी गरिरहेका छौँ ।”

पुष्पालाई दुई र अञ्जलीलाई एक महिनाको उमेरमा आमाबाट छुट्टिएर अनाथ भएको अवस्थामा उद्धार गरि दुवैलाई गत वैशाख ३१ मा प्राकृतिक वासस्थानमा छाडिएको थियो । सो समयमा पुष्पाको उमेर तीन वर्ष चार महिना र पूजाको उमेर दुई वर्ष एक महिना पुगेको थियो । हाल पुष्पाको उमेर चार वर्ष तीन महिना र पूजाको उमेर तीन वर्ष पुगेको छ । पोथी गैँडा चार वर्षपछि प्रजननका लागि योग्य हुन्छन् ।

हालसम्म तीन वटा गैँडा स्थानान्तरण गरिएको छ । अहिले चितवन राष्ट्रिय निकुञ्जमा आन्तरिक गैँडा स्थानान्तरण चलिरहेको छ । चितवन राष्ट्रिय निकुञ्जका प्रमुख संरक्षण अधिकृत डिलबहादुर पुर्जा पुन मगरले निकुञ्जको पश्चिम क्षेत्रका गैँडा पूर्वतर्फ सारिँदै गरेको बताए । पछिल्लो गणनाअनुसार नेपालमा सात सय ५२ वटा गैँडा छन् । त्यसमध्ये चितवन राष्ट्रिय निकुञ्जमा सबैभन्दा धेरै छ सय ९४ वटा छन् ।