गोरखामा मजदुर कुटिएको आरोपमा सार्वजनिक यातायात बन्द

गोरखा । ग १ ख ७१९१ नम्बरको बस चालक अर्जुन परियार र सहचालक टीकाराम नेपालीमाथि फागु फूर्णिमाको दिन गोरखा नगरपालिका–७ धारापानीमा स्थानीय युवाले कुटपिट गरेपछि यातायात मजदुर कुटिएको विरोधमा गोरखामा यातायात व्यवसायीले बुधबार सार्वजनिक यातायात बन्द गरेका छन् ।

मजदुरहरुले कुटपिटमा संलग्नहरुलाई कारबाहीको माग गर्दै बुधबार बिहानदेखि यातायात बन्द गराएका हुन् । बन्दका कारण जिल्लाभित्रै चल्ने र जिल्लाबाहिर जाने सार्वजनिक यातायात चलेका छैनन् ।

अखिल नेपाल यातायात मजदुर संघका जिल्ला अध्यक्ष निर्मल रानाले धारापानीका हरि श्रेष्ठ, धुव्र श्रेष्ठ र समित श्रेष्ठसहितको टोलीले यातायात मजदुरमाथि कुटपिट गरेको बताए । मंगलबार अखिल नेपाल यातायात मजदुर संघ र नेपाल यातायात स्वतन्त्र मजदुर संगठनले दोषीमाथि कारबाहीको माग गर्दै जिल्ला प्रशासन कार्यालय र प्रहरी कार्यालयमा ज्ञापन पत्र बुझाएका छन् ।