१५ जना प्रदर्शनकारी प्रहरी नियन्त्रणमा

काठमाडौँ । सिंहदरबारको दक्षिण गेट अगाडि रुसी सेनामा कार्यरत नेपालीको जीवन रक्षाको माग गर्दै सोमबार प्रदर्शन गर्ने १५ जनालाई प्रहरीले नियन्त्रणमा लिएको छ । उनीहरुले रुसी सेनामा भर्ना भएर मृत्यु भएकाहरुको शव फिर्ता, सम्पर्कविहीन भएकाको खोजी एवं अलपत्र परेका नेपालीहरुको उद्धारको माग राख्दै प्रदर्शन गरेका थिए ।

जिल्ला प्रहरी परिसर काठमाडौँका प्रवक्ता तथा प्रहरी उपरीक्षक नवराज अधिकारीले सचेतना अभियानकी अभियन्ता कृतु भण्डारीको नेतृत्वमा सिंहदरबार अगाडि प्रदर्शन गरिरहेका उनीहरुलाई नियन्त्रणमा लिइएको जानकारी दिए । दस पुरुष र पाँच महिला गरी १५ जनालाई नियन्त्रणमा लिएर प्रहरी वृत्त सिंहदरबारमा राखिएको जिल्ला प्रहरी परिसर काठमाडौँले जनाएको छ ।