ललितपुर इन्टरनेसनल ट्रेड एक्स्पो सुरु

काठमाडौं । मेड इन नेपाल नारासहित बिहीबारदेखि ललितपुर इन्टरनेसनल ट्रेड एक्स्पो २०२४ सुरु भएको छ । ललितपुर चेम्बर अफ कमर्सको आयोजनामा ललितपुरस्थित जावलाखेल फुटबल ग्राउन्डमा सुरु भएको एक्स्पोको उपप्रधान तथा परराष्ट्रमन्त्री श्रेष्ठले उद्घाटन गरेका हुन् ।

कार्यक्रममा उनले हस्तकलाको केन्द्र र कला नगरीका रूपमा ललितपुरले कायम राख्दै आएको पहिचानलाई एक्स्पोले महत्वपूर्ण भूमिका खेल्ने बताए । नेपाल सांस्कृतिक तथा प्राकृतिकरूपमा समृद्ध देश भएको बताउँदै मन्त्री श्रेष्ठले आर्थिक विकासमा तीव्रता दिँदै छलाङ मार्ने गरी अगाडि बढ्नुको विकल्प नरहेको समेत बताए । आगामी सोमबारसम्म चल्ने इन्टरनेसनल ट्रेड एक्स्पोमा मेड इन नेपाल प्याभिलियनमा विशेष आकर्षण रहेको छ । ललितपुर इन्टरनेसनल ट्रेड एक्स्पोमा नेपाल, भारत, पाकिस्तान, श्रीलंका, बंगलादेश, थाइल्यान्ड, टर्की, मलेसिया, दक्षिण कोरियालगायतका देशहरूमा उत्पादित विविध वस्तु तथा सामग्री, मौलिक उत्पादन र सेवासम्बन्धी सामानहरू इन्टरनेसनल ट्रेड एक्स्पोमा राखिएको छ ।

ट्रेड एक्स्पोमा फर्निचर, छालाबाट बनाइएका वस्तु, हस्तकलाका सामग्री, लत्ताकपडा, सारी, कुर्था, बेडसिट, जुत्ता–चप्पल, नक्कली गरगहनालगायतका सामग्री प्रदर्शनीमा राखिएको ललितपुर चेम्बर अफ कमर्सका अध्यक्ष पुष्परत्न शाक्यले बताए । मेलामा एक सयभन्दा बढी स्टलहरू रहेका छन् । मेलाको आकर्षणको रूपमा ललितपुरमा उत्पादित काठबाट बनाइएका कलाकृतिहरू, मूर्ति, कार्पेट र कपडाको जीवन्त प्रदर्शन गरिएको छ ।