तेमालको पोखरी नारायणस्थानमा सार्वजनिक जमिन मिचेर बनाइएका ५९ घर भत्काइने

काठमाडौं : जनप्रतिनिधिविहीन अवस्थामा सार्वजनिक जग्गा कब्जा गरी पक्की संरचना समेत निर्माण गरिएको साबिक पोखरी नारायणस्थान (हालको तेमाल गाउँपालिकाको केन्द्र समेत रहेको) वडा नम्बर ५ का ५९ घर घत्किने भएका छन् । ‘भकुण्डे–मेच्छे सडक निर्माणका क्रममा सार्वजनिक जग्गा अतिक्रमण गरी निर्माण भएका सबै घर– टहरासहितका संरचना भत्काउन ३५ दिने सूचना जारी गरिएको छ’–गाउँपालिका उपाध्यक्ष डिएम लामाले भने, ‘सडक विस्तारका क्रममा सबै संरचना भत्कनेछन् ।

त्यसका लागि स्थानीयहरूलाई समयावधिभित्रै घर–टहरा हटाउन अनुरोध गरिएको छ ।’ उक्त स्थानमा रहेको सार्वजनिक पोखरीलाई पहिलाकै अवस्थामा रहन दिन स्थानीयले अनुरोध गरेका छन् । पोखरीभित्र निर्माण गरिएका पक्की कंक्रिटसहितका संरचनाले पुराना संरचनाहरू नष्ट हुने क्रम बढेको स्थानीयले बताए ।

स्थानीय तेमाल सिं तामाङले २०५९ सालपछि जनप्रतिनिधि नभएको अवस्थामा आफूहरूले घर निर्माण गरेको बताए । सार्वजनिक जग्गामा निर्माण गरिएको भए पनि गाउँपालिकाले उक्त घरहरू भत्काउन नहुने उनले बताए । ‘पोखरी नारायणस्थानमा पहिलो पटक पक्की घर निर्माण गरेर बजार सुरु गर्ने म नै हुँ’, उनले भने, ‘अहिले बाटो विस्तारका क्रममा यी पक्की घरहरू भत्काउन सूचना जारी भए पनि हाम्रोतर्फबाट घर छाडेर बाटो बनाउन अनुरोध गरेका छौँ ।’ गाउँपालिकाले जारी गरेको सूचनाभित्र घरहरू भत्किन कठिन हुने उनले बताए ।

भकुण्डेबाट १३ किलोमिटर सडक कालोपत्रे गर्नेगरी २० महिनाअघि आह्वान गरिएको बोलपत्रअनुसार निर्माण व्यवसायीले काम नगरेका कारण २२ प्रतिशत मात्रै कार्य सम्पन्न भएको छ । सडक निर्माणकार्य अलपत्र हुँदा दैनिक दुर्घटना हुनेगरेको छ । तेमालका ऐतिहासिक पोखरीहरू पुरिने तथा पोखरीभित्रै पक्की संरचना निर्माणको क्रम भने रोकिएको छैन । चापाँखोरी कुरुवास वडा कार्यालयअगाडिको पोखरीभित्र अर्काे संरचना निर्माण गरिएको छ ।