इस्लाम धर्मावलम्बीको ईद पर्वमा भोलि सार्वजनिक बिदा

काठमाडौँ । गृह मन्त्रालयले एक विज्ञप्ति जारी गरी इस्लाम धर्मावलम्बीको पर्व ईद(उल फित्र ईद)को अवसरमा सरकारले बिहीबार सार्वजनिक बिदा दिने निर्णय गरेको जानकारी दिएको छ ।

यसवर्ष बुधबार आकाशमा चन्द्रमा नदेखिएका कारण ईदको अन्तिम दिन बिहीबार सार्नु परेको मुस्लिम धर्माबलम्बीको भनाइ छ । सरकारले हरेक वर्षको ईद(उल फित्र ईद)का अवसरमा सार्वजनिक बिदा दिँदै आएको छ ।

ईदको अन्तिम दिन मुस्लिम समुदायमा बिहानै उठेर नुहाइधुवाइ गरी मस्जिदमा नमाज पढेर धार्मिक मनोभाव आदानप्रदान गर्ने परम्परा छ । साथै मुस्लिम समुदायले आफन्तमाझ अङ्गालो हालेर आत्मियता साट्ने गर्छन् ।