परिसंघका पदाधिकारी र जापानका राजदूतबीच भेटवार्ता

काठमाडौं, मंसिर २९
नेपालका लागि जापानका राजदूत मासामिची सेइगो र नेपाल उद्योग परिसंघका पदाधिकारीहरुबीच भेटवार्ता भएको छ । भेटमा परिसंघका अध्यक्ष सतिश कुमार मोरले नेपाल र जापानबीचको आर्थिक तथा व्यापारिक एवं लगानी र पर्यटनमा रहेको द्विपक्षीय सम्बन्धलाई थप प्रगाढ बनाउनुपर्ने बताए । जापानको आर्थिक तथा व्यावसायिक विकासबाट नेपालले सधै लाभ लिइरहेको र यसलाई थप विस्तार गर्न जापानको लगानी बढाउन सहजकर्ताको भूमिका निर्वाह गर्न परिसंघ तयार रहेको अध्यक्ष मोरको भनाइ थियो । खासगरी उत्पादनमूलक क्षेत्र, कृषि तथा पर्यटनमा लगानीका सम्भावनाहरु रहेकोतर्फ अध्यक्ष मोरले राजदूत मासामिचीको ध्यानाकर्षण गराए ।

नेपाल भ्रमण वर्ष २०२० को सन्दर्भमा नेपालमा जापानी पर्यटकको संख्या बढाउन राजदूतावासले सक्रिय भूमिका निर्वाह गर्न समेत अध्यक्ष मोरले राजदूतसमक्ष आग्रह गरे । जापानको औद्योगिक क्षमता तथा दक्षतालाई मध्यनजर राख्दै नेपालमा दक्ष जनशक्तिको अभाव रहेकाले जापानमा औद्योगिक परीक्षार्थी आदानप्रदान गर्ने सन्दर्भमा समेत अध्यक्ष मोरले सहकार्य गर्न सकिने बताए । सो अवसरमा राजदूत मासामिची सेइगाले जापान र नेपालको आर्थिक तथा व्यापारिक सम्बन्ध विस्तारलाई आफूले प्राथमिकतामा राखेको बताए ।

द्विपक्षीय आर्थिक तथा व्यापारिक सम्बन्ध विस्तार र औद्योगिक प्रशिक्षार्थी आदानप्रदान एवं तालिमका सन्दर्भमा थप मद्दत गर्नेबारे थप गृहकार्य गरी सहकार्य अघि बढाउने राजदूत मासामिची सेइगाले उल्लेख गरे । भेटवार्तामा परिसंघका उपाध्यक्षहरु, दूतावासका आर्थिक मामिला हेर्ने अधिकारी समेतको उपस्थिति थियो ।