निर्वाचनसम्बन्धी ऐन संशोधन प्रस्ताव चाँडै संसद्मा लैजान जोड

काठमाडौं । गृहमन्त्री रमेश लेखकले निर्वाचनसम्बन्धी ऐन संशोधनको प्रस्तावलाई छिट्टै संसद्मा लैजान जोड दिएका छन् । निर्वाचन आयोगमा प्रमुख निर्वाचन आयुक्तसहितका पदाधिकारीसँगको सोमबार भएको छलफलमा उनले निर्वाचनसम्बन्धी ऐन संशोधन तथा राजनीतिक दलसम्बन्धी ऐन संशोधन प्रस्ताव छिट्टै संसद्मा लैजानुपर्ने बताएका हुन् ।

दुवै ऐनको संशोधन प्रस्तावलाई पारित गराउन आफूले नेतृत्वदायी भूमिका निर्वाह गर्ने उनले प्रतिबद्धता समेत जनाएका थिए । ‘ती संशोधन प्रस्तावहरूलाई पारित गर्नुपर्छ । त्यसकारण जतिसक्दो चाँडो ल्याउनुहोस् । केही कुरा टुङ्ग्याउन बाँकी छ भने संसद्ले नै टुङ्ग्याउँछ,’ उनले भने । यस्तै, कार्यक्रममा गृहमन्त्री लेखकले आवधिक निर्वाचन लोकतन्त्रको महत्वपूर्ण आधारस्तम्भ रहेको बताए । आयोगले पारदर्शी, स्वच्छ, स्वतन्त्रता, निष्पक्ष र विश्वसनीय निर्वाचन सञ्चालन र व्यवस्थापनमा कुशलतापूर्वक भूमिका निर्वाह गरेको उनको भनाइ थियो । यसका साथै निर्वाचन आयोगको भवनलगायतका पूर्वाधार निर्माणमा सरकारले सहयोग गर्ने उनले बताए ।

छलफलमा प्रमुख निर्वाचन आयुक्त दिनेशकुमार थपलियाले नेपालको संविधानमा सबै तहका निर्वाचनहरूको सञ्चालन रेखदेख, निर्देशन र नियन्त्रण गर्नका लागि आयोगले स्वतन्त्र एवम् स्वायत्त भएर काम गरेको बताए । यस्तै, उनले निर्वाचन आयोगको कार्यालय भवनको पुनर्निर्माण, प्रस्तावित एकीकृत निर्वाचन कानुन र सोमा भएका नयाँ व्यवस्था तथा राजनीतिक दलसम्बन्धी ऐन, २०७३ लाई परिमार्जित गरी परिष्कृत गर्दा व्यवस्था गर्नुपर्ने मुख्य विषयहरूका बारेमा गृहमन्त्रीलाई जानकारी गराएका थिए । उक्त छलफल कार्यक्रममा निर्वाचन आयोगका आयुक्तहरू, आयोगका सचिव, गृह मन्त्रालयका सचिव तथा आयोग र गृह मन्त्रालयका कर्मचारीहरूको उपस्थिति रहेको थियो ।

तपाईको प्रतिक्रिया

Login

Label

{} [+]

Name*

Email*

Label

{} [+]

Name*

Email*

0 Comments

Inline Feedbacks

View all comments