रम्भा गाउँपालिकाका योजना निर्धारित समयमै सम्पन्न गर्न तीव्र गतिमा कार्यान्वयन

बुटवल । रम्भा गाउँपालिका, पाल्पाले चालु आर्थिक वर्षका लागि छनौट गरेका योजनाहरू निर्धारित समयसीमाभित्र सम्पन्न गर्ने लक्ष्यसहित तीव्र गतिमा कार्यान्वयन अघि बढाएको छ ।

गाउँपालिकाका अध्यक्ष विष्णु प्रसाद भण्डारीले सबै उपभोक्ता समिति, ठेकेदार तथा सरोकारवालालाई आवश्यकीय ताकेता दिँदै आगामी जेठ दोस्रो सातासम्म सम्पूर्ण योजना सम्पन्न गर्नेगरि तयारी गरिएको जानकारी दिए । उनले गाउँपालिकाको मूल नारा ‘रम्भा गाउँपालिकाको शान, सुखी रम्भावासी, समृद्ध हाम्रो अभियान’ अनुरूप संघीयता लागू भएको सुरुवाती चरणदेखि नै योजनाहरूलाई प्रभावकारी रूपमा कार्यान्वयन गर्दै आएको बताए । उनका अनुसार कृषि तथा पशुपालनलाई आर्थिक विकासको मेरुदण्ड मान्दै दूध उत्पादन वृद्धि, गाईभैंसी प्रवर्द्धन, सहुलियत कर्जा, आधुनिक कृषि औजार वितरण, फलफूल जोन विस्तार, शीत भण्डारण केन्द्र तथा भूमि बैंक स्थापना लगायतका कार्यक्रम सञ्चालन भइरहेका छन् । सामाजिक तथा स्वास्थ्य क्षेत्रमा पनि विविध कार्यक्रम अघि बढाइएको छ ।

गाउँपालिकाले निःशुल्क प्रयोगशाला सेवा, पोषणमैत्री कार्यक्रम, मोतियाविन्दु शल्यक्रिया, खोप कार्यक्रम, जेष्ठ नागरिक स्वास्थ्य सेवा, सामुदायिक स्वास्थ्य स्वयंसेविकाका प्रोत्साहन, बीमा सेवा, एकीकृत घुम्ती शिविर, सुत्केरी यातायात कार्यक्रम तथा गर्भवती महिलालाई पोषणयुक्त कोशेली वितरण जस्ता कार्यक्रम लागू गरिरहेको जनाएको छ । शिक्षा क्षेत्रमा ‘पढ्दै जाउँ, कमाउँदै जाउँ’ नीति तथा प्रविधीमैत्री शिक्षाको अवधारणा अघि बढाइएको छ । अभिभावकविहीन तथा अतिविपन्न बालबालिकाका लागि अभिभाकत्व ग्रहण गरी माध्यमिक तहसम्म अध्यापनको व्यवस्था गरिएको अध्यक्ष भण्डारीले जानकारी दिए । गाउँपालिकाले एक वडा–एक खेल मैदान, पूर्वाधार विकास, पिउनेपानी तथा सरसफाइ, सु–शासन तथा वातावरण संरक्षणजस्ता क्षेत्रमा पनि काम भइरहेको जनाएको छ ।

प्रमुख प्रशासकीय अधिकृत बीरबहादुर पुनका अनुसार चालु आर्थिक वर्षमा रहेका करिब २० ठूला योजनामध्ये १५ वटा टेन्डर प्रक्रियामा भइसकेका छन् । मंसिर मसान्तसम्म सबै योजना टेन्डर प्रक्रियामा गइ काम सुरु हुने उनले बताए । यसवर्ष कर्भडहल, १५ शैयाको अस्पताल सञ्चालन, प्रशासकीय भवन निर्माण तथा पर्यटन प्रवद्र्धनका कार्यक्रमहरू प्राथमिकतामा परेको उनले जानकारी दिए । उनका अनुसार ‘स्मार्ट आमा’ कार्यक्रम, पोषणमैत्री कार्यक्रम, राष्ट्रपति रनिङ सिल्ड, ‘एक घर एक करेसाबारी’, एकीकृत घुम्ती शिविर तथा प्रविधीमैत्री सेवा लगायतका कार्यक्रमले स्थानीयले प्रत्यक्ष लाभ पाउने विश्वास लिइएको छ ।

गाउँपालिकाले आन्तरिक आम्दानीका रूपमा कर र शुल्कका विभिन्न शीर्षकहरूबाट स्रोत संकलन गर्दै आए पनि ती अपर्याप्त रहेको प्रमुख प्रशासकीय अधिकृत पुनले बताए । आन्तरिक आम्दानी वृद्धि गर्न करको दायरा विस्तार गर्ने रणनीति अवलम्बन गरिएको तर सीमित स्रोतसाधनका कारण जनताको आवश्यकता प्राथमिकताका आधारमा कार्यान्वयनमा ल्याउनुपर्ने अवस्था रहेको जानकारी दिए ।

तपाईको प्रतिक्रिया

Login

Label

Name*

Email*

Label

Name*

Email*

0 Comments

Oldest

Newest Most Voted

Inline Feedbacks

View all comments