गहनामा रसायनको रूपमा प्रयोग हुने ५० केजी धातुसहित दुई जना पक्राउ

बटुकनाथ झा
जनकपुरधाम, भदौ २३
सुनचाँदीमा प्रयोग हुने रसायन धातुसहित प्रहरीले जनकपुरबाट दुईजनालाई पक्राउ गरेको छ । प्रहरीले जनकपुरधाम–५ सोनरपट्टीबाट महोत्तरी मटिहानी–७ बस्ने २० वर्षीय श्याम दास र सोही ठाउँका २२ वर्षीय मो.नुरारी लहेरीलाई सोमबार पक्राउ गरेको हो ।

भन्सार छली सुनचाँदीमा प्रयोग हुने रसायन धातु ओसारपोसार भइरहेको गोप्य सूचनाको आधारमा जिल्ला प्रहरी कार्यालय धनुषाका प्रहरी नायब निरीक्षक मकेन्द्र मिश्रको कमाण्डमा खटेको प्रहरी टोलीले उनीहरूलाई पक्राउ गरेको हो । दुईवटा साइकलमा सवार उनीहरूको साथबाट १० लाख ६२ हजार पाँच सय मूल्यबराबरको अन्दाजी ५० केजी रसायन धातु फेला परेको जिल्ला प्रहरी कार्यालय धनुषाले जनाएको छ ।

नियन्त्रणमा लिइएको रसायन धातु आवश्यक कारबाहीको लागि जनकपुर भन्सार कार्यालयमा पठाइएको डीएसपी मिश्रले जानकारी दिए। साथै पक्राउ परेका दुवै जनालाई जिल्ला प्रहरी कार्यालयको हिरासतमा राखेर थप अनुसन्धान भइरहेको उनले जनाए ।