चरीकोट डिवाट्स आयोजना कार्यान्वयन सहमति तथा वित्तीय सम्झौतापत्रमा हस्ताक्षर
दोलखा ।
दोलखा जिल्लाको भीमेश्वर नगरपालिकामा पानी तथा ढल व्यवस्थापनका लागि चरीकोट डिवाट्स आयोजना कार्यान्वयन सहमति तथा वित्तीय सम्झौतापत्रमा हस्ताक्षर गरिएको छ ।सिंहदरबारमा सञ्चार तथा सूचना प्रविधिमन्त्री पार्वत गुरुङको उपस्थितिमा बुधबार भीमेश्वर नगरपालिकाका मेयर भरतबहादुर केसी र सहरी खानेपानी तथा सरसफाइ आयोजना व्यवस्थापन कार्यालयका निर्देशक रामकुमार श्रेष्ठबीच सो आयोजना कार्यान्वयनसम्बन्धी सहमति तथा वित्तीय सम्झौतापत्रमा हस्ताक्षर भएको हो ।
चरीकोट बजारसहित भीमेश्वर नगरपालिकाको वडा नम्बर ३, ४ र ६ मा रहेको बजार क्षेत्रमा प्रशोधन प्रणालीमार्फत खानेपानी तथा ढल व्यवस्थापनका लागि एसियाली विकास बैंकको ऋण सहायतामा सो आयोजना निर्माण सम्पन्न हुने सम्झौतापत्रमा उल्लेख गरिएको छ । सो आयोजनाको कुल लागत ९१ करोड ५१ लाख ३६ हजार रूपैयाँ रहेको छ भने त्यसको कुल लागतको १५ प्रतिशत स्थानीय तहले व्यहोर्नु पर्नेछ । कार्यक्रममा सरकारका प्रवक्ता एवं सञ्चार तथा सूचना प्रविधि मन्त्री गुरुङले हिमाली जिल्लामा नेपालमै पहिलो पटक सञ्चालनमा ल्याइएको सो आयोजना नमूना आयोजनाको रूपमा अघि बढ्ने बताए ।
भीमेश्वर नगरपालिका बजार क्षेत्रको खानेपानी तथा ढल व्यवस्थापनका लागि सञ्चालनमा आउने सो आयोजना राष्ट्रकै नमूना आयोजना भएकाले त्यसलाई समयमै सम्पन्न गर्न उनले भीमेश्वर नगरपालिका र आयोजना कार्यान्वय कार्यालयलाई आग्रह समेत गरे । वाग्मती प्रदेशसभा सदस्य पशुपति चौलागाईँले सो आयोजना सम्पन्न गर्न सक्दो सहयोग गर्ने प्रतिबद्धता व्यक्त गरे । भीमेश्वर नगरपालिकाका मेयर केसीले नगरकै गौरवको आयोजना भएकोले समयमै निर्माण सम्पन्न गर्ने बताए । साथै आयोजना कार्यान्वयन कार्यालयका निर्देशक श्रेष्ठले सो आयोजना सम्पन्न गर्न स्थानीय जनप्रतिनिधिहरूले सक्दो सहयोग गर्ने विश्वास व्यक्त गरे ।
कार्यक्रममा जिल्ला समन्वय समिति दोलखाका प्रमुख डबलबहादुर पाण्डे, भीमेश्वर नगरपालिकाका प्रमुख प्रशासकीय अधिकृत मानबहादुर खड्का, सञ्चार मन्त्री गुरुङका सञ्चार विज्ञ राजेन्द्र मानन्धरलगायतको उपस्थिति रहेको थियो । हिमाली जिल्लामध्ये दोलखा जिल्लाको भीमेश्वर नगरपालिकामा यो आयोजना पहिलो पटक सञ्चालनमा ल्याइएको दाबी गरिएको छ । सो आयोजना संरचना निर्माणका लागि आवश्यक स्थानलगायतका व्यवस्था सरोकारवालाहरूको सहमतिमा भीमेश्वर नगरपालिका आफैँले गर्नेछ ।
क्याटेगोरी : समाचार
ताजा अपडेट
- कांग्रेस नेता अफताब आलमलाई जन्मकैदको सजाय
- मुख्यमन्त्री कँडेललाई विश्वासको मत
- आगलागीबाट ७९ घर जले, एकको मृत्यु
- उपनिर्वाचनमा सेना परिचालन गर्न स्वीकृति प्रदान
- डेभलपमेण्ट बैंकर्स एशोसिएसन नेपालको प्रमुख कार्यकारी अधिकृतमा डंगोल नियुक्त
- सिटिजन लाइफद्वारा जेन जेड लक्षित कार्यक्रम सञ्चालन
- सय दिनको रोजगारीको लागि १५ हजार बढीको आवेदन
- सूर्य नेपाल काठमाडौं ओपनको दोस्रो दिन दिनेश र भुवन शीर्षस्थानमा
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया