Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठसमाचारसांग्रिला डेभलपमेन्ट बैंकद्वारा आरएन सप्लायर्सलाई धितोको बढी मूल्यांकन गरी ऋण प्रवाह

सांग्रिला डेभलपमेन्ट बैंकद्वारा आरएन सप्लायर्सलाई धितोको बढी मूल्यांकन गरी ऋण प्रवाह


काठमाडौं ।
सांग्रिला डेभलपमेन्ट बैंकले आरएन सप्लायर्सलाई दिएको कर्जामा कैफियत देखिएको छ । सञ्चालक लक्ष्मी खड्का रहेको सप्लायर्सलाई बैंकले २०७५ कात्तिक १३ गते १९ करोड ९० लाख रुपैयाँ कर्जा दिएको थियो । तर त्यो कर्जाको लागि बैंकले जुुन धितो लिएको थियो, त्यो निकै महंगो थियो । उक्त कर्जाको लागि बैंकले काठमाडौंको बत्तीसपुतलीमा रहेको २५ आना जग्गा धितो लिएको थियो ।

ऋणको लागि बैंक प्रतिआना जग्गाको बजार मूल्य एक करोड ६५ लाख रुपैयाँ कायम ग-यो । जसअनुसार २५ आना जग्गाको मूल्य ३० करोड रुपैयाँ कायम गर्दै आरएन सप्लायर्सको नाउँमा १९ करोड ९० लाख रुपैयाँ कर्जा स्वीकृत गरियो । यसरी बढी मूल्यांकन गरी कर्जा दिएको, उक्त कर्जाको नियमितरुपमा सावाँ ब्याज उठाउनको लागि ऋणीलाई थप ऋण दिएको र ऋण तिर्न नसकेपछि धितोमा रहेको उक्त जग्गा ऋणी समेतको मिलेमतोमा बिक्री गरी दोस्रो पक्षलाई दिएको छ । तर यो विषयमा बैंकका प्रमुख कार्यकारी श्रेष्ठ भने कुनै पनि समस्या नभएको बताउँछन् । ‘बजारमा हल्ला भएजस्तो बैंकको कुनै पनि शीर्षकको कर्जामा समस्या छैन’, प्रमुख कार्यकारी श्रेष्ठले भने ।

बैंकले लक्ष्मी खड्का सञ्चालक रहेको आरएन सप्लायर्सलाई दिएको कर्जा नीति संगत भएको र यसमा कुुनै पनि बदनियत नभएको भन्दै प्रमुुख कार्यकारी श्रेष्ठले जग्गाको प्रचलित बजार मूल्यांकनकै आधारमा कर्जा प्रवाह गरिएको बताए । ‘यदि कसैले कर्जाको बढी मूल्यांकन गरेको भन्छ भने सम्बन्धित ठाउँमा गएर त्यस क्षेत्रको जग्गाको मूल्य बुुझ्दा पनि जग्गाको वास्तविक मूल्य थाहा हुन्छ’, उनले भने । बैंकले सधैँ नेपाल राष्ट्र बैंकको सबै किसिमको नीति निर्देशनहरुलाई अक्षरशः पालना गर्दै स्वच्छ रुपमा वित्तीय सेवा सञ्चालन गर्दै आएको समेत उनले बताए ।

लक्ष्मी खड्कासँग सम्बन्धित कर्जा सेटल भइसकेको र यसमा कुनै समस्या नरहेको समेत उनले प्रष्ट पारे । बैंकका हरेक वित्तीय परिसूचक सबल रहेको समेत प्रमुख कार्यकारी श्रेष्ठले बताए । हाल चुक्ता पुँजी दुुई अर्ब ६० करोड ६६ लाख ४० हजार रुपैयाँ रहेको सांग्रिलाले चालू आर्थिक वर्षको पहिलो त्रैमासिक अवधिमा ३० अर्ब ५१ करोड ४३ लाख छ हजार रुपैयाँ निक्षेप संकलन गरी २४ अर्ब आठ करोड ८७ लाख ६८ हजार रुपैयाँ कर्जा प्रवाह गरेको छ ।

यस अवधिमा बैंकले तीन करोड १५ लाख १६ हजार रुपैयाँ खुद मुनाफा आर्जन गरेको छ भने निष्क्रिय कर्जाको अनुपात एक दशमलव २८ प्रतिशत रहेको छ । गत आवको सोही अवधिमा भने बैंकले पाँच करोड ९५ लाख ९३ हजार रुपैयाँ खुद मुनाफा आर्जन गर्दा शून्य दशमलव ९४ प्रतिशत कर्जा निष्क्रिय रहेको थियो । ‘गत आवको सोही अवधिमा बैंकमा पाँच दशमलव ४४ प्रतिशतको स्प्रेडदर रहेकोमा अहिले यस्तो स्प्रेडदर घटाएर चार दशमलव ९७ प्रतिशतमा सीमित राखेका छौँ । यदि हाम्रा वित्तीय परिसूचकहरु सबल थिएनन् भने हाम्रा लागि यो उपलब्धि सम्भव थिएन’, प्रमुख कार्यकारी श्रेष्ठले भने ।

बैंकले जहिले पनि राष्ट्र बैंकको नीति, नियम र निर्देशिकाको परिधिभित्र रहेर वित्तीय कारोबार गर्दै आएको उल्लेख गर्दै उनले थपे, ‘सांग्रिला डेभलपमेन्ट बैंकसँग जोडिएका सबै कर्मचारी, सेयर होल्डर, सञ्चालक एवं व्यवस्थापन समिति पहिलो दायित्व नै बैंकलाई सबल, प्रतिस्पर्धी र जनताको आफ्नो बैंक बनाउने हो ।’ सांग्रिला डेभलपमेन्ट बैंकको लक्ष्मी खड्कासँग सम्बन्धित कर्जामा कुुनै पनि किसिमको समस्या नरहेको राष्ट्र बैंकका उच्च अधिकारीले बताए । ‘बैंकले उक्त कर्जा हाल सेटल पनि गरिसकेको छ, यसमा कुनै समस्या छैन’, ती अधिकारीले भने ।


क्याटेगोरी : समाचार

तपाईको प्रतिक्रिया