सिनर्जी पावर कम्पनीले २२ मेगावाटको मध्य होंगु खोला ‘ए’ जलविद्युत् आयोजनामा लगानी गर्ने

काठमाडौं ।
सिनर्जी पावर डेभलपमेन्ट कम्पनीले २२ मेगावाटको मध्यहोंगु खोला ‘ए’ जलविद्युत् आयोजनामा लगानी गर्ने भएको छ । कम्पनीको बुधबार भएको साधारणसभाले नयाँ आयोजनामा लगानी गर्ने प्रस्ताव पारित गरेसँगै कम्पनीलाई सोलुखुम्बुको होंगु खोलामा रहेको उक्त जलविद्युत् आयोजनामा लगानी गर्ने बाटो खुलेको हो ।

कम्पनीका अनुसार उक्त आयोजनामा स्वपुँजीको ४० प्रतिशत सेयर कम्पनीले लगानी गर्नेछ । यस आयोजनाले विद्युत् उत्पादनको सर्वेक्षण अनुमति प्राप्त गरी नेपाल विद्युत् प्राधिकरणसँग विद्युत् खरिदबिक्री सम्झौता गरिसकेको कम्पनीका अध्यक्ष इन्द्रबहादुर थापाले जानकारी दिए ।

कम्पनीले भर्चुअल माध्यमबाट एकैपटक तीन आर्थिक वर्षको साधारणसभा सम्पन्न गरेको छ । कम्पनी गत आर्थिक वर्ष २०७४/७५, २०७५/७६ र २०७६/७७ को साधारणसभा सम्पन्न गरेको जनाएको छ । साधारणसभाले लाभांशसहितका विभिन्न प्रस्तावहरू सर्वसम्मतले पारित गरेको छ । कम्पनीले २०७७ असारसम्मको खुद मुनाफाबाट हाल कायम चुक्ता पुँजीको चार दशमलव ७५ प्रतिशत बोनस सेयर र कर प्रयोजनको लागि शून्य दशमलव २५ प्रतिशत नगद गरी कुल पाँच प्रतिशत लाभांश वितरणको प्रस्ताव गरेको थियो ।

उक्त प्रस्ताव सभाबाट सर्वसम्मतले पारित भएको छ । कम्पनीले आईपीओ निष्काशन गरेपछि पहिलोपटक लाभांश प्रस्ताव गरेको हो । यसैगरी सभाले उल्लिखित आर्थिक वर्षको वार्षिक प्रतिवेदन छलफल गरी पारित गर्ने, लेखापरीक्षक प्रतिवेदन छलफल गरी पारित गर्ने, लेखापरीक्षक नियुक्ति गर्ने, प्रबन्धपत्र र नियमावलीमा आवश्यक संशोधन गर्ने, संशोधित नियमावली र प्रबन्धपत्रमा कुनै फेरबदल गर्नुपरे सञ्चालक समितिलाई अख्तियारी दिनेलगायतका प्रस्ताव पारित गरेको छ ।

सेयरधनीलाई प्रदान गरिने लाभांश दरले निरन्तरता पाओस् भन्ने उद्देश्यले सेयरधनीको मागबमोजिम नै व्यवसाय बढाउनको लागि नयाँ आयोजनामा लगानी गर्ने निर्णय गरिएको कम्पनीका अध्यक्ष थापाले बताए । उनले आगामी वर्षमा लाभांश दर बढाउँदै लैजाने दाबी समेत गरे । कम्पनीले हाल दोलखामा १० मेगावाटको सिप्रिन खोला जलविद्युत् आयोजना सञ्चालन गरिरहेको छ ।